Trabzonspor i fiksuar me Muçin, klubi turk dëshiron të blejë kartonin nga Besiktas

Ernest Muçi vijon të jetë në qendër të vëmendjes te Trabzonspori, ku paraqitjet e tij të fundit kanë shtuar presionin mbi drejtuesit për të marrë një vendim. Trajneri Fatih Teke ka dhënë miratimin për blerjen e kartonit të mesfushorit të Kombëtares, por klubi ka zgjedhur të presë deri në fund të sezonit për të vlerësuar situatën.

Trabzonasve nuk u nxiton aspak të shpenzojnë 8.5 milionë euro, shumë që duhet paguar për ta transferuar përfundimisht 24-vjeçarin, sidomos pasi tashmë kanë investuar 1 milion euro për huazimin. Për momentin, klubi po vëzhgon me kujdes formën e Muçit, i cili ka shpërthyer me pesë gola në tre ndeshjet e fundit, duke u kthyer në një nga pikat më të forta të skuadrës.

Ndërkohë, nga ambientet pranë futbollistit mësohet se Muçi ndihet shumë mirë te Trabzonspori dhe e sheh me pozitivitet vazhdimin e karrierës në këtë klub. Mbështetja e vazhdueshme nga trajneri Teke ka qenë vendimtare për ringritjen e tij, sidomos pas një sezoni të vështirë te Besiktashi, ku minutat ishin të pakta.

Aktualisht, Superliga turke kryesohet nga Galatasaray, vetëm dy pikë përpara Trabzonit, që vazhdon garën për titull. Ndeshja e radhës e Muçit dhe shokëve do të jetë pikërisht ndaj Besiktashit, skuadrës që zotëron kartonin e tij, duke i shtuar edhe më shumë emocion kësaj sfide.