U martua 11 ditë më parë, Diego Jota ishte baba i 3 fëmijëve

Futbollisti portugez Diogo Jota, i cili humbi jetën në një aksident tragjik rrugor në Spanjë, ka lënë pas një trashëgimi të pasur në futbollin evropian. Pas fillimeve të tij në Portugali, ai u transferua te Atlético Madrid, më pas u huazua te Porto, dhe më vonë u afirmua te Wolverhampton në Angli.

Në vitin 2020, ai u bashkua me Liverpool FC, ku u kthye në një nga sulmuesit më të rëndësishëm të skuadrës. Me ekipin anglez, ai fitoi Premier League-n në sezonin 2024/25, si dhe arriti 182 paraqitje dhe shënoi 65 gola me fanellën e “Reds”.

Me kombëtaren portugeze, Jota regjistroi suksese të mëdha duke fituar dy herë UEFA Nations League – herën e parë në edicionin 2018/19 dhe më pas në 2024/25.

Në karrierën e tij të shkurtër, por të suksesshme, Jota numëron edhe trofe të tjerë si:

1 Community Shield

1 FA Cup (Kupa e Anglisë)

2 Carabao Cup (Kupa e Ligës angleze)

1 Championship me Wolverhampton në sezonin kur u ngjitën në Premier League.

Tragjedia ndodhi vetëm 11 ditë pasi ai u martua më 22 qershor 2025 me partneren e tij të gjatë, Rute Cardoso. Jota lë pas bashkëshorten dhe tre fëmijë të vegjël, duke lënë në pikëllim jo vetëm familjen, por gjithë komunitetin sportiv. /Koha Jonë/