Udinese bën paqe me Lazion, Strakosha dhe Hysaj luajnë titullarë (VIDEO)

Dueli i mbrëmjes së sotme Udinese-Lazio nuk shkoi më shumë se një barazim 1-1. Gerard Deulofeu ndëshkoi kryeqytetasit në minutën e pestë të takimit. Një harkim në zonë u devijua nga Perez që gjeti të lirë Deulofeun. Ky i fundit nga shumë pranë portës nuk fali dhe e çoi topin në rrjetë.

Në fundin e pjesës së parë, Felipe Anderson vendosi baraspeshën. Krosimi i Cataldit u devijua në zonë nga Zaccagni, ndërsa topi shkoi në këmbët e Felipe Anderson. Ky i fundit me portën e boshatisur e pati të thjeshtë për të shënuar

Në pjesën e dytë, Lazio e nisi më e organizuar dhe kërkoi të përmbyste gjithçka që në minutat e para. Gjithsesi asgjë nuk do të ndryshonte deri në fund. Strakosha dhe Hysaj e nisën si titullar ndeshjen duke bërë paraqitje pozitive, veçanërisht portieri që mbrojti ekipin bardhekaltër nga gola të sigurt.