United në kërkim të trajnerit të ri, Maresca në “pole positions”

Pas shkarkimit të Ruben Amorim, Manchester United ka nisur procesin për të zgjedhur trajnerin e ri të skuadrës. Për momentin, pankina e “Djajve të Kuq” i është besuar Darren Fletcher, i cili do ta drejtojë ekipin përkohësisht, deri në marrjen e një vendimi përfundimtar nga drejtuesit e klubit.

Sipas asaj që raporton Gianlucadimarzio.com, në “Old Trafford” po shqyrtohen disa opsione: ose emërimi i një trajneri tranzitor deri në fund të sezonit, ose zgjedhja e menjëhershme e një profili të nivelit të lartë për të hapur një cikël të ri.

Mes emrave të përfolur ka dalë edhe ai i Enzo Marescës, i cili së fundmi është ndarë nga Chelsea. Trajneri italian po vlerësohet seriozisht nga drejtuesit e United, edhe për shkak të një lidhjeje të fortë profesionale në prapaskenë.

Drejtori sportiv i Manchester United, Omar Berrada, e njeh mirë Mareskën, pasi ka qenë pikërisht ai që e kishte sjellë trajnerin italian te Manchester City në të kaluarën. Ky raport mund të luajë një rol të rëndësishëm në zhvillimet e ardhshme.

Vendimi përfundimtar pritet në ditët në vijim, teksa klubi synon të rikthejë stabilitetin dhe ambicien në një sezon të vështirë për skuadrën.