Vanoli: Gati të qëndroj te Dinamo dhe në Kategorinë e parë

Dinamo është thuajse në Kategorinë e Parë dhe këtë verdikt duket se e kanë pranuar edhe drejtuesit e skuadrës. Gjithsesi, janë edhe 3 javë për t’u zhvilluar dhe blutë do të kërkojnë të thonë fjalën e tyre, duke nisur nga ndeshja me Kukësin në transfertë.

Trajneri Rudolfo Vanoli vlerëson kundërshtarin, teksa jo më kot kërkon zonën evropiane, por sipas tij, Dinamo nuk është larg për nga cilësia, pavarësisht se gjërat kanë ardhur në këtë pikë.

“Kemi zhvilluar ndeshje të mira, por fatkeqësisht rezultatet nuk kanë qenë ato të duhurat. Tani na pret sfida me Kukësin. Natyrisht është një ekip i fortë dhe jo më kot kërkon të jetë mes tre më të mirëve për të hyrë në Evropë. Por edhe Dinamo ka cilësi dhe do të tentojmë të marrim më të mirën.

Do të qëndoja te Dinamo për të rinisur nga zero. Do të ulem të bisedoj me presidentin për të diskutuar projektin e ri. Dinamo është një emër i madh dhe një klub me histori, ndaj do të ishte kënaqësi të punoja për ta risjellë ku e ka vendin. Të shohim se çfarë do të ndodhë”, tha strategu italian.

Dinamon e mban në lojë vetëm matematika, teksa duhet t’i fitojë të 3 ndeshjet, pasi me Egnatian ka një diferencë prej 3 golash dhe rrogozhinasit mos marrin asnjë pikë në 2 sfidat e tjera.