Vëllezërit Bakaj shkëlqejnë sërish, marrin fitoret e radhës në Zvicër

Vëllezërit Bakaj vazhdojnë të shkruajnë histori suksesi në ring, duke ruajtur rekordin e tyre të pamposhtur në boksin profesionist. Roberto dhe Amarildo Bakaj dolën fitimtarë nga sfidat e radhës, duke mposhtur përkatësisht kolumbianin Brayan Santander dhe italianin Francesco Morand, në një mbrëmje të suksesshme për sportin shqiptar.

Roberto Bakaj konfirmoi edhe një herë nivelin e lartë të përgatitjes dhe pjekurisë së tij sportive. Përballë një kundërshtari të fortë si Santander, boksieri shqiptar tregoi qetësi, disiplinë dhe kontroll të plotë të situatës. Që në raundet e para, ai diktoi ritmin e duelit, duke dominuar teknikisht dhe fizikisht, pa i lënë hapësira reale kundërshtarit për të reaguar.

Triumfi i fundit e çon Roberton në 16 fitore në po aq ndeshje, duke ruajtur një rekord perfekt dhe duke forcuar pozitat e tij si një emër premtues në arenën ndërkombëtare të boksit.

Suksesi nuk mungoi as për vëllain e tij, Amarildo Bakaj, i cili me vendim të gjyqtarëve siguroi fitoren e 15-të radhazi në karrierën e tij profesionale. Paraqitja e tij në ring ishte bindëse, ndërsa respekti i fituar u reflektua edhe në fundin e ndeshjes, ku vetë Francesco Morand e përgëzoi publikisht, duke e ngritur lart para tifozëve të pranishëm.