Vjen dhe oferta zyrtare, grupi amerikan blen për një shifër të frikshme Chelsea-n

Një grup investitorësh, i kryesuar nga Todd Boehly është gati të formalizojë blerjen e Chelsea-t për afro 5 miliardë euro. Financieri amerikan është njëkohësisht edhe bashkëpronar i skuadrës së bejsbollit, Los Angeles Dodgers.

Oferta zyrtare e mbërritur u konfirmua edhe nga vetë blutë e Londrës, që arkivojnë epokën e drejtimit të Roman Abramovich. Në njoftimin e klubit theksohej se “shitja e aksioneve do të finalizohet në fund të muajit maj, periudhë në të cilën do të përfundojë i gjithë dokumentacioni i nevojshëm”.

Kjo pjesë duket vetëm një formalitet, pasi grupi i drejtuar nga Boehly është aprovuar paraprakisht si blerës. Shifra prej afro 5 miliardë eurosh përfshin blerjen e Chelsea, së bashku me infrastrukturën dhe angazhimi për të vijuar investimet në ekipin e Londrës perëndimore.

Për të mbrojtur financat e klubit, janë vendosur disa kufizime rreth komisioneve që përfitohen nga administrimi, shpërndarja e dividendëve dhe për sa i takon borxheve. Marrëveshja erdhi pas sanksioneve që qeveria e Mbretërisë së Bashkuar vendosi për oligarkun Roman Abramovich, prej periudhës kur Rusia pushtoi Ukrainën.