Vlahovic rikthehet në stërvitje, mund të jetë në stol që ndaj Pisës

Dusan Vlahovic është rikthyer sot në stërvitje me grupin për herë të parë që nga dita e dëmtimit, duke punuar pjesërisht me shokët e skuadrës. Një sinjal i qartë se gjendja e qendërsulmuesit serb po përmirësohet ndjeshëm pas ndalesës së pësuar më 29 nëntor.

Edhe pse nuk ka përfunduar ende plotësisht fazën e rikuperimit, prania e tij në fushë përkrah pjesës tjetër të ekipit tregon se rikthimi në ndeshje është gjithnjë e më pranë. Në rrjetet sociale, agjenti i tij Darko Ristic ka publikuar një foto të sulmuesit me një orë rëre në sfond, një mesazh i qartë se numërimi mbrapsht ka nisur.

Më shumë se tre muaj pas dëmtimit, Vlahovic duket gati për hapin e radhës. Seancat e ardhshme do të jenë vendimtare për ta integruar plotësisht në punën me skuadrën dhe për të rikthyer formën fizike optimale pas mungesës së gjatë.

Nuk përjashtohet mundësia që ai të grumbullohet për sfidën që ekipi i drejtuar nga Luciano Spalletti do të luajë ndaj Pisa-s të shtunën, më 7 mars. Edhe nëse nuk do të jetë ende gati për të nisur si titullar, sulmuesi mund të bashkohet me skuadrën në stol, në pritje të rikthimit të plotë.

Paralelisht me zhvillimet në fushë, mbeten për t’u parë edhe lëvizjet në merkato, veçanërisht sa i përket mundësisë së rinovimit të kontratës së tij. Rikthimi i Vlahovic në formë do të ishte një lajm i madh jo vetëm për repartin ofensiv, por edhe për projektin afatgjatë të klubit.