Vllaznia dhe Kukësi bëjnë paqe, Egnatia shokon kampionët në fuqi

Vllaznia dhe Kukësi nuk shkuan më shumë se një barazim mes tyre në “Loro Boriçi”Liridon Latifi zhbllokoi sfidën që në minutën e 8-të, ndërsa më pas shkodranët patën disa mundësi për të gjetur golin e dytë, por shpërdoruan dhe në një moment u ndalën edhe nga shtylla.

Goli i barazimit erdhi në minutën e 68-të me anë të sulmuesit moldav Puntus, ndërsa më pas ishin sërish shkodranët që u hodhën në sulm, por pa ia dalë të gjejnë golin e fitores, ndonëse patën disa mundësi. Deri në fund rezultati nuk do të ndryshonte duke lënë Kukësin në vendin e dytë me 28 pikë, ndërsa shkodranët zbresin në vendin e katërt me 25 pikë, dy më pak se Laçi.

Egnatia rikthehet te fitorja pas nëntë javësh duke marrë një fitore 2-1 në “Elbasan Arena” ndaj Teutës.  Artur Magani realizoi dy golat e fitores për ekipin rrogozhinas, që i jep fund ecurisë prej tre humbjeve radhazi dhe i dhuron triumfin e parë trajnerit nga Shkupi. Kjo ishte humbja e pestë në Abissnet Superiore për skuadrën bregdetare, që renditet në vend të gjashtë me 18 pikë, 4 më shumë se Egnatia.