“Whoscored”/ Mbrojtësi i Shqipërisë ka zhvilluar ndeshjen më të dobët në Europë

Sajti i specializuar për statistikat e futbollit dhe vlerësimin e futbollistëve, “Whoscored” ka publikuar edhe tre futbollistët që kanë bërë ndeshjet më të këqija në sezonin që lamë pas, duke marrë për bazë 5 kampionatet më të mëdha europiane.

E veçanta është se ndeshjen më të dobët në sezonin që lamë pas, e ka bërë pikërisht mbrojtësi i Kombëtares Shqiptare, Frederik Veseli në përballjen e Napolit dhe Salernitanës, e cila përfundoi me rezultatin 4-1 më 23 janar të këtij viti.

Mbrojtësi kuqezi e nisi sfidën si titullar në krahun e djathtë të mbrojtjes, por la fushën e lojës i ndëshkuar me kartonin e dytë të verdhë në minutën e 53-të, kur edhe shkaktoi penalltinë e dytë në favor të vendasve.

Veseli u vlerësua me notën 3.9, absolutisht më e dobëta që një lojtar ka marrë gjatë sezonit që lamë pas, në të 5 kampionatet më të forta të Europës.

Pas Veselit, notë zhgënjyese ka marrë edhe Ben Forster i Watfordit, vetëm 3.91 në ndeshjen ndaj Wolves, ndërsa podium plotësohet nga Danijel Petkovic i Angers, i vlerësuar me notën 3.93 në sfidën ndaj Lens.

📉 Worst rated performance in a match in Europe’s top 5 leagues last season:

1⃣ Frederic Veseli (Salernitana) – 3.90 vs Napoli
2⃣ Ben Foster (Watford) – 3.91 vs Wolves
3⃣ Danijel Petkovic (Angers) – 3.93 vs Lens

— WhoScored.com (@WhoScored) June 26, 2022