Yamal dhe Thuram përqafime në fushë dhe ngacmime në rrjetet sociale

Në përfundim të një dueli epik mes Interit dhe Barcelonës në gjysmëfinalet e Champions League, një moment i veçantë sportiv u pa mes Marcus Thuram dhe Lamine Yamal. Sulmuesi i Interit u afrua për të ngushëlluar yllin 17-vjeçar të katalanasve, i cili, i shkatërruar pas eliminimit, qëndronte me kokën ulur në fushën e “San Siros”.

Një gjest që përmbante gjithë frymën e respektit mes kampionëve, ose siç thonë në SHBA: “game recognizes game”,  kampionët e vërtetë njohin njëri-tjetrin.

Thuram, me një prekje të kokës dhe një përqafim, i dha një mesazh simbolik Yamalit: “Kokën lart, djalosh, e ardhmja është e jotja”.

Edhe pse Barcelona ndalet një hap larg finales, me talentet si Yamal, Cubarsí, Pedri dhe të tjerë, ndjesia është se ky është vetëm fillimi i një cikli të ri për klubin katalanas. Megjithatë, pas këtij gjesti të bukur në fushë, Thuram nuk i rezistoi tundimit për një thumbim në rrjetet sociale.

Në një story në Instagram, që më pas e fshiu, ai publikoi një foto ku përqafohej me Yamalin në qendër të fushës. Në vetvete, një imazh i bukur – por përshkrimi e prishi gjithçka: “On a mission ehh!! 😂😂😂” – një referencë ironike ndaj deklaratës së Yamal pas ndeshjes së parë, ku tha se Barcelona ishte “në një mision” për të arritur finalen.