Zidane me “dorë të hekurt”, lë jashtë grumbullimit Bale për sfidën me City-in

E ardhmja e Gareth Bale me shumë mundësi do të jetë larg Madridit gjatë kësaj vere. Situata e uellsianit po bëhet gjithnjë e më e komplikuar, teksa është lënë jashtë grumbullimit për duelin e kthimit kundër Manchester City-it.

Ai nuk është përfshirë në listën me 24 futbollistë nga trajneri Zidane, edhe pse do të kërkohet përmbysja e humbjes 2-1 në ndeshjen e parë të luajtur në “Santiago Bernabeo”. Bale ka munguar edhe në 6 ndeshjet e fundit në kampionat. Lajmi më i mirë është rikthimi në dispozicion i Eden Hazard, i cili ka qenë i dëmtuar prej një periudhe të gjatë.

Lista e përjashtimeve për këtë ndeshje nga Zidane shtohet edhe me emra të tjerë si James Rodriguez dhe Mariano Diaz, të dy nuk kanë përmbushur kërkesat e strategut francez. /R.Lika-Koha Jone/