ZYRTARE/ Reali rikthen mbrojtësin nga Benfica, paguan plotë 50 milionë euro

Përfundon me sukses marrëveshja mes Real Madrid dhe Benfikës për transferimin e mbrojtësit të majtë Álvaro Carreras. Futbollisti spanjoll i lindur në vitin 2003 do t’i bashkohet “Los Blancos” me një kontratë afatgjatë, që do ta mbajë në Madrid deri më 30 qershor 2031.

Njoftimi zyrtar i Real Madrid:

“Real Madrid C.F. dhe Benfica kanë arritur një marrëveshje për transferimin e Álvaro Carreras, i cili do të jetë pjesë e klubit tonë për gjashtë sezonet e ardhshme, deri më 30 qershor 2031.”

Carreras është rritur në akademinë e Real Madrid, ku luajti midis viteve 2017 dhe 2020 në nivelet U23 dhe ekipet zinxhir. Ai kaloi më pas te Manchester United, ku u shpall lojtari më i mirë i ekipit U23 për sezonin 2021–22.

Në janar, ai u transferua te Benfica, me të cilën fitoi Kupën e Ligës Portugeze këtë vit. Ky transferim përforcon më tej repartin e majtë të mbrojtjes së Real Madrid, duke shtuar një tjetër talent të rritur në shtëpinë “merengue”.