ZYRTARE/ Viktor Gyokeres do të jetë lojtari më i ri i Arsenalit

Një nga telenovelat më të mëdha të merkatos ndërkombëtare këtë verë ka marrë fund: Viktor Gyokeres është shumë pranë transferimit te Arsenali. Sulmuesi suedez, pas dy sezoneve të jashtëzakonshme me Sporting Lisbonën, largohet drejt Premier League në një operacion që kap vlerën e mbi 70 milionë eurove.

Sporting do të përfitojë 63.5 milionë euro plus 10 milionë euro bonuse, ndërkohë që vendimtare në realizimin e marrëveshjes ka qenë vullneti i vetë lojtarit dhe gatishmëria e agjentëve të tij për të ulur kërkesat mbi komisionet, me qëllim që transferimi të finalizohej.

Me 97 gola në 102 ndeshje me fanellën e klubit portugez, Gyokeres tani kalon në Premier League, ndërsa dëshira e tij për t’u bashkuar me Arsenalin ka qenë thelbësore. Edhe pse ditët e fundit pati një tentativë nga Manchester United dhe ish-trajneri i tij Ruben Amorim, sulmuesi suedez nuk kishte dyshime, donte vetëm Arsenalin.

Gyokeres ka qenë gjithmonë zgjedhja e parë e trajnerit Mikel Arteta, që kërkon një sulmues të aftë të finalizojë lojën e ndërtuar nga ekipi i tij ofensiv. Në orët në vijim pritet që ai të kryejë vizitat mjekësore në Angli, duke u bërë kështu një nga blerjet më të mëdha të kësaj merkatoje nga një klub anglez.