“Apple” gjobitet për abuzim me pozicionin dominues

Autoriteti Italian i Konkurrencës (AGCM) ka gjobitur kompaninë amerikane të teknologjisë “Apple” me 98.6 milionë euro, duke e akuzuar për abuzim me pozicionin e saj dominues në tregun e aplikacioneve digjitale. Vendimi u bë publik përmes një deklarate zyrtare, ku autoriteti italian thekson se kompania ka shkelur rregullat e konkurrencës së ndershme, veçanërisht në raport me zhvilluesit e aplikacioneve që operojnë përmes platformës App Store.

Sipas AGCM-së, “Apple” mban një pozicion absolutisht dominues në këtë treg, pasi App Store është kanali i vetëm për shpërndarjen e aplikacioneve në pajisjet iPhone dhe iPad. Ky avantazh, sipas autoritetit, është shfrytëzuar nga kompania për të vendosur kushte kufizuese dhe të njëanshme që dëmtojnë konkurrencën.

Në qendër të kritikave janë politikat e privatësisë së “Apple”, të cilat, sipas AGCM-së, u imponohen zhvilluesve të aplikacioneve në mënyrë disproporcionale. Autoriteti italian vlerëson se këto rregulla, ndonëse justifikohen me mbrojtjen e të dhënave personale të përdoruesve, në praktikë favorizojnë shërbimet dhe aplikacionet e vetë “Apple”, duke penalizuar konkurrentët.

“Kushtet e vendosura nga ‘Apple’ janë të njëanshme, shkelin interesat e partnerëve të biznesit dhe nuk janë proporcionale me qëllimin e deklaruar të mbrojtjes së privatësisë”, thuhet në deklaratën e autoritetit italian të konkurrencës.

Nga ana e saj, “Apple” ka reaguar menjëherë duke shprehur kundërshtimin e fortë ndaj vendimit. Në një njoftim për shtyp, kompania bëri të ditur se do ta apelojë gjobën, duke argumentuar se politikat e saj të privatësisë zbatohen në mënyrë të barabartë për të gjithë zhvilluesit, përfshirë edhe vetë “Apple”.

Kompania thekson se këto rregulla janë miratuar dhe vlerësuar pozitivisht nga përdoruesit dhe autoritetet e mbrojtjes së të dhënave në shumë vende të botës. Vendimi i AGCM-së pritet të shtojë debatet mbi fuqinë e platformave të mëdha teknologjike dhe rolin e tyre në tregjet digjitale evropiane.