Certifikohet programi eBILLS, i pari që kryen fiskalizim në kohë reale dhe lëshon faturën elektronike

Ministria e Financave njofton se në janar 2021 duhet të bëhet transmetimi në kohë reale për të gjitha faturat që bizneset kryejnë me institucionet publike, por koha është shumë e shkurtër. Burime nga DPT na njoftojnë se u certifikua programi i parë qe kryen fiskalizimin në Kohë Reale dhe Faturën Elektronike. Programi i emërtuar eBills, i krijuar nga BNT Electronics u certifikua paraprakisht për fiskalizimin, dhe javën e kaluar kaloi me sukses të gjitha testimet për Faturën Elektronike.

Nga 1 janari, të gjitha bizneset që kanë marrëdhënie me entet publike do të lëshojnë vetëm faturë elektronike si dokumentacion të vlefshëm tatimore, në bazë të ligjit të ri për fiskalizimin. Ky është hapi i parë për vënien në funksionim të sistemit të ri të fiskalizimit, i cili do të ndryshojë rrënjësisht mënyrën se si bizneset sot kryejnë faturimet.

A është e mundur që të gjitha bizneset private të bëhen gati në datën 1 janar që të lëshojnë faturë Elektronike drejt Institucioneve Shtetërore? Specialistët e fushës janë mosbesues se edhe nëse fillon menjëherë përshtatjen me programet, koha është tepër e kufizuar që procedurat të bëhen në mënyrë të rregullt.