Dëmtimet bëjnë me “dhimbje koke” Sylvinhon, në dyshim edhe Asllani

Shqipëria do të jetë e “copëtuar” në prag të dy sfidave të fundit në Ligën e Kombeve ndaj Republikës Çeke dhe Ukrainës. Në momentin më përcaktues, Sylvinho sheh të humbas “pjesët” më të rëndësishme të ekipit përfaqësues.

Këtë edicion në Ligën e Kombeve, strategu brazilian nuk ka pasur në asnjë ndeshje Armando Brojën dhe Berat Gjimshitin. Dëmtimet e shumta po kthehen në “makth” për teknikun kuqezi pasi listës së dëmtimeve iu shtuan edhe lojtarë si Kumbulla, Rey Manaj dhe Keidi Bare.

Shqetësuese është edhe gjendja e Kristjan Asllani. Mesfushori i Inter u pa edhe në seancën e parë stërvitore me gjurin e fashuar. Që nga sfida e fundit kundër Gjeorgjisë, Asllani ka luajtur vetëm 20 minuta me Interin.

Situata nuk është shumë pozitive as te Republika Çeke pasi së fundmi kanë humbur 4 lojtarë për shkak dëmtimi. Krejci, Vitik, Zima dhe Kalvach do të mungojnë në duelin kundër Shqipërisë, që do të luhet të shtunën në mbrëmje.