Gjergj Luca nga shtëpia e Franz Kafkës, thirrje për ndërgjegjësim në thellësinë e mendimit që farkëtoi Evropën

Nga Albert Vataj
Sipërmarrësi Gjergj Luca, në vijim të vizitës së tij në Pragë, ka zgjedhur të ndalojë në një prej vendeve më domethënëse të këtij qyteti, shtëpinë e Franz Kafkës. Nuk është thjesht një destinacion turistik. Është një pikë takimi midis historisë dhe ndërgjegjes moderne, një hapësirë ku vizitori ballafaqohet me një botë letrare që ka shënjuar mendimin europian të shekullit XX dhe hedhur mendimin thellë në shekullin XXI.

“Në Pragë mund të bësh gjithçka, por nuk mund të lihet pa vizituar muzeumi i legjendës Franz Kafka…”, shkruan Luca në një video-postim të shpërndarë në rrjetet sociale. Në këtë reflektim, ai përpiqet të rikthehet tek origjina e mendimit kafkian, ankthi i njeriut përballë sistemit, izolimi, absurdi i ekzistencës, por edhe pyetja e përhershme mbi lirinë dhe përgjegjësinë. Muzeu nuk paraqitet thjesht si një hapësirë ekspozuese, por si një labirint simbolik, ku tekstet, dorëshkrimet dhe dëshmitë e jetës së shkrimtarit rreshtohen si pjesë të një profecie letrare që sot duket edhe më aktuale.

Në vijim të shënimit të tij, Luca nënvizon: “Ju që nuk e njihni, pyesni pastaj filloni komentoni. Imagjino të ishte gjallë Kafka, çfarë do mund t’i bënit ju në faqen e tij në Facebook apo Instagram…”
Ky pasazh, në dukje i thjeshtë, në fakt ngre një dilemë të mprehtë moderne: si do ta përballonte Kafka, shkrimtari i heshtjes, i vetmisë intelektuale dhe i dyshimit të përhershëm, epokën e komenteve impulsive, të gjykimeve të menjëhershme dhe të konsumit sipërfaqësor të ideve? A do të kishte vend për thellësi, për introspeksion dhe për dilemë filozofike në një realitet ku gjithçka shndërrohet në reagim të shpejtë?

Pikërisht këtu vizita e Lucës merr një dimension më të gjerë. Ajo nuk është thjesht homazh ndaj një figure letrare, por një thirrje për lexim, për njohje dhe për kthim tek ideja se mendimi i madh kërkon kohë dhe përqendrim. Duke vendosur vëmendjen mbi Kafkën, Luca sugjeron në mënyrë të nënkuptuar se shoqëria bashkëkohore rrezikon të humbasë aftësinë për të reflektuar thellë mbi strukturat që na rrethojnë: shtetin, burokracinë, teknologjinë, raportin midis individit dhe pushtetit.

Franz Kafka nuk ofron përgjigje të qeta. Ai hap plagë konceptuale, flet për njeriun që endet në korridore pa fund, për fajin pa shpjegim, për kërkesën për drejtësi që përpëlitet në labirintin e procedurave. Pikërisht këto dimensione, që dikur duken si alegori të një realiteti totalitar, sot lexohen si paralajmërime për kohën digjitale, për dehumanizimin e përditshëm dhe për rënien e etikës në rrjetet sociale.

Në këtë kontekst, thirrja e Lucës “pyesni, pastaj komentoni” nuk është një frazë morale; është një ftesë për të rikthyer kulturën e leximit, të njohjes dhe të përgjegjësisë intelektuale. Vizita e tij në shtëpinë e Kafkës shndërrohet kështu në një akt simbolik: një kujtesë se qytetërimi europian mbështetet mbi letërsinë, filozofinë dhe reflektimin, jo mbi nxitimin dhe paragjykimin.
Në fund, qëndrimi pranë muzeut të Kafkës është më shumë se një foto turistike. Është një ballafaqim me pyetje që nuk sosin, kush jemi ne përballë strukturave që vetë ndërtojmë? Sa të lirë jemi realisht? Dhe a kemi ende vullnetin të lexojmë, përpara se të gjykojmë?