Gjergj Luca shpërthyes dhe i vërtetë, në Podcast përballë Grida Dumës

Nga Albert Vataj
Rrëfim i pazakontë për humbjet, ringritjen dhe të vërtetat e një njeriu që nuk di të fshihet pas fjalëve.

Gjergj Luca, i ftuar në “Grida Duma Podcast”, ka sjellë një nga daljet e tij më të forta dhe më të vërteta publike. Ai ka rrëfyer me një sinqeritet të rrallë periudhën dramatike kur humbi gjithçka në botën e kazinove, momentin e falimentimit në kulmin e karrierës, kur gjithçka dukej se shuhej përballë tij. Në këtë rrëmujë emocionesh dhe përvojash, Luca rikthen me detaje takimin vendimtar me kryeministrin Edi Rama, udhën e vështirë të rikthimit përmes biznesit të peshkut dhe etapat e një ringritjeje që nuk ishte as e thjeshtë, as e menjëhershme.

Ai flet pa doreza për lidhjet me politikën, për marrëdhëniet me Ramën dhe Berishën, për miqësitë, për distancat, për të vërtetat që shpesh në këtë vend i mbajnë mbyllur pas dyerve. Luca shpalos versionin e tij të njeriut që, edhe në marrëdhënie me pushtetin, nuk heziton të thotë atë që mendon, të parë gjithmonë nga prizmi i ndërgjegjes personale dhe lirisë për të folur.

Në këtë përballje, ai erdhi siç është: shpërthyes, i drejtpërdrejtë, pa rrumbullakosje fjalësh. Luca rrëfen rrugëtimin nga fillimet e vështira si sfidant i fatit, tek ngritja si sipërmarrës i guximshëm që nuk njeh kompromis me vetveten. Tregon për biznesin, për sfidat, për dështimet që e formësuan, për rikthimin që e rilindi. Ai flet edhe si prind, si familjar që ka kaluar stuhi dhe ka mbajtur peshën e gabimeve e përgjegjësive; si një shpirt emocional, që ndoshta më shumë se çdo gjë tjetër, beson te puna, te etika dhe te e vërteta.

Ky është Gjergj Luca që publiku e njeh, por që rrallë e ka dëgjuar kaq të çlirët: një njeri që ka rrëzuar mite e ka ngritur të reja, një karakter që kundërshton stagnimin dhe një zë që nuk i shmanget as të kaluarës, as të ardhmes. Në podcastin me Grida Dumën, ai la gjurmën e një rrëfimi që nuk kërkon të pëlqehet, por të kuptohet.