Konventa e LSI. Kryemadhi: Koha për të shpëtuar Shqipërinë dhe shqiptarët

https://www.facebook.com/kohajone/videos/734252513430955/

Lëvizja Socialiste për Integrim mbajti dje Konventën Kombëtare, një nga forumet më të lartë vendimmarrës, ku u vendos për qëndrimet politike të kësaj partie. Kryetarja e LSI, Monika Kryemadhi në fjalën e saj tha se është koha që të merren vendime të rëndësishme për vendin dhe qytetarët, pasi qeveria “Rama” ka dalë nga misioni kushtetues, duke u bërë palë me krimin.

Konventa Kombëtare e LSI-së ka dalë me një rezolutë me tetë pika, nga dekriminalizimi, bashkëpunimi me Partinë Demokratike, por edhe qëndrimin ndaj mazhorancës.

Rezoluta e LSI-së:

1.Mandatojmë Kryetarin e Partisë, Grupin Parlamentar dhe Kryesinë e LSI, që të jenë në krye të betejës për dekriminalizimin e politikës, të luftës së hapur ndaj krimit të organizuar dhe trafikut të drogës.

2.Nuk do të pranohet asnjë aleancë me grupe apo individë në politikë, që kanë probleme me drejtësinë.

3.Mbështesim plotësisht Kryetarin e Partisë dhe forumet drejtuese të LSI, që të drejtojnë Partinë në bashkëpunimin politik me parti, aktorë të shoqërisë civile e faktorë të tjerë politikë e shoqërorë të të gjitha niveleve,që janë të gatshëm për një opozitë të qartë e pa kompromis kundër qeverisë së Rilindjes. Bashkimi bën fuqinë!

4.Aleancat antikrim dhe antidrogë nuk mund të pengohen kurrsesi nga asnjë ndasi ideologjike. Vendimarrja politike e Kryetarit, e KDK dhe e Kryesisë të përshtatet në varësi të zhvillimeve konkrete politike në vend,por në asnjë rast të mos pranohet asnjë marrëveshje apo kompromis me bashkëpunëtorët e krimit të organizuar dhe drogës.

5.Kanabizimi i vendit dhe vendosja e Shqipërisë në hartën e trafiqeve më të rrezikshme ndërkombëtare të drogës është projekti më kriminal me të cilin Rilindja nxiu e damkosi vendin. Konventa e denoncon njëzëri këtë projekt si antikombëtar, rrënues dhe të papranueshëm.

6. LSI e ka propozuar dhe mbështet fort dhe pa asnjë hezitim heqjen e plotë të imunitetit për çdo zyrtar të shtetit! Të gjithë duhet të jenë të barabartë para ligjit!

7. LSI do të mbështesë çdo prokuror, oficer të policisë gjyqësore apo gjykatës, që në bazë të ligjit kërkon të hetojë politikanë tëcilitdo subjekt e grupim politik qofshin në maxhorancë apo opozitë.

8. LSI e konsideron bashkëpunimin me Rilindjen si të pamundur. Ai është një grup në funksion të interesave të krimit e drogës, tëprovuara këto gjerësisht. Bashkëpunim me socialistët e thjeshtë, por jo me Rilindjen.