Nuk ndalet Gjergj Luca, brenda dy javësh, edhe Elbasani do të ketë “Allishverishin” e vet

Nga Albert Vataj
Gjergj Luca është ndër ata njerëz që e jetojnë punën si pasion dhe që çdo ditë i japin kuptim fjalës “sipërmarrës”. Ai nuk është nga ata që ndalen te fjala apo premtimi, e njeh vetëm ritmin e veprimit, të krijimit, të përkushtimit të pandalshëm. Kudo që të ndodhesh, e gjen gjithnjë në ndonjë kantier të ri, mes punëtorëve dhe ideve që marrin formë, duke përveshur mëngët e duke dhënë shembullin e njeriut që ofrohet me duar e me shpirt.

Pas suksesit të “Allishverishit” në Tiranë, Luca e zhvendos tashmë këtë frymë pune dhe shërbimi në zemër të Shqipërisë, në Elbasan. Brenda dy javëve, qyteti do të ketë “Allishverishin” e vet, një hapësirë që shkon përtej konceptit të një restoranti, një ambient ku përfshihet e gjithë gama e produkteve të detit të firmës “Rozafa”, me standardet që kanë bërë emër kudo, pa harruar fasadat e këtij allishverishi ku do të jenë të pranishëm përmes pikturave personazhe të politikës dhe medias, dhe jo vetëm.
Synimi është i qartë, çdo qytet shqiptar të ketë “Allishverishin” e vet, një pikë referimi për cilësi, shije dhe identitet kombëtar në kuzhinë.
Në videon e publikuar nga kantieri i punimeve në Elbasan, Luca shfaqet mes punëtorëve, i drejtpërdrejtë dhe me humorin e tij karakteristik, duke thënë: “Na marrin shumë në gojë ne elbasanllinjtë, ndaj e kemi për detyrë të bëjmë edhe ne një ‘Allishverish’ që t’u mbyllim gojën me punë!”
Dhe me stilin e tij të njohur, shton: “Ju vazhdoni shani e mallkoni me komente në rrjete sociale, ndërkohë unë vazhdoj me investime. Restoranti Allishverish 2 hap dyert së shpejti në Elbasan, ndaj mos harroni lugën në brez dhe ju mirëpres!”
Ky mesazh është më shumë se një promovim. Është një deklaratë filozofie pune, qëndrimi i një njeriu që nuk reagon ndaj negativitetit me fjalë, por me vepra. “Rozafa”, kompania që ai ka ngritur me përkushtim e që sot është një nga simbolet e prodhimit shqiptar, lufton cinizmin dhe mosbesimin jo me retorikë, por me investime konkrete, që krijojnë vende pune, rrisin standardet e tregut dhe ngrenë lart produktet “Made in Albania”.
“Allishverishi” në Elbasan nuk është thjesht një hapje e re restoranti, por një tjetër kapitull në historinë e një sipërmarrjeje që sfidon skepticizmin me rezultate. Është dëshmia se vizioni i Gjergj Lucës përfshin jo vetëm ushqimin e mirë, por edhe një filozofi shërbimi që i kthen qytetet shqiptare në pika energjie, bashkimi dhe krenarie.
Në çdo linjë shërimi, në çdo investim të “Rozafës”, gjendet e njëjta frymë, besimi se puna e ndershme, cilësia dhe përkushtimi janë përgjigjja më e mirë ndaj çdo mosbesimi. Dhe ndërsa të tjerët mjaftohen me fjalë, Luca vazhdon të ndërtojë, duke e bërë realitet idenë se suksesi, si peshku i detit që ai sjell në tryezat tona, kërkon të mbahet gjithmonë i freskët, me ide të reja, me guxim dhe me dashuri për vendin.