Elton Metaj: Amerikanët, duam Korridorin Tetë

(Botuar me 16 Prill 1998 në KOHA JONE)

Nga Elton Metaj-

TIRANË – Realizimi i Korridorit të Tetë merr një tjetër shtysë nga pala amerikane. Naftësjellësi Burgas – Vlorë, rrjeti hekurudhor shqiptar dhe Porti i Durrësit kanë qenë pikat për të cilat është diskutuar midis përfaqësuesve të agjencive të ndryshme amerikane dhe delegacionit shqiptar të kryesuar nga zv/ministri i Punëve Publike dhe Transportit, Sadedin Çeliku, gjatë vizitës në SHBA. “Në fund të muajit maj do të prezantohet projekti përfundimtar i naftësjellësit ndërkontinental Burgas – Sofje – Shkup – Vlorë me një vlerë prej 826 milionë USD”- tha dje për “Koha Jonë”, drejtori i Marrëdhënieve me Jashtë në Ministrinë e Punëve Publike dhe Transportit, Ilia Çili. Ky projekt është hartuar nga kompania amerikane AMBO dhe në Stamboll të Turqisë do të zhvillohet një takim me vendet prodhuese të naftës e gazit të Azisë Qendrore dhe vendet nëpër të cilat kalon korridori transkontinental Nr. 8. Prezantimin e projektit para botës financiare për palën amerikane do ta bëjë z. Holbruk. Gjithashtu lidhur me Korridorin e Tetë, që është një iniciativë amerikane, një projekt i veçantë i është kushtuar rrjetit hekurudhor shqiptar. Agjencia Amerikane për Tregtinë dhe Zhvillimin (TDA) i ka dorëzuar ambasadës amerikane në Tiranë kopjen e Marrëveshjes së Grantit për të bërë efektiv një transh prej 1. 6 milionë USD. Vlefta prej 1. 6 milionë USD përbën transhin e dytë të të gjithë shumës së dhënë nga qeveria amerikane për transportin dhe do të përdoret për pajisje për sistemin e telekomunikimit të hekurudhës shqiptare. Shuma e plotë e dhënë falas nga qeveria amerikane për Shqipërinë është 10. 3 milionë USD, nga të cilat 2. 3 milionë USD tashmë janë në dispozicion të palës shqiptare për t’u përdorur. Akti përfundimtar do të jetë firmosja së shpejti nga Ministri i Punëve Publike dhe Transportit, Gaqo Apostoli dhe Ambasadorja e SHBA-së, Mariza Lino i Marrëveshjes së Grantit. Ndërkohë për projektin e Portit të Durrësit që do të financohet nga Banka Botërore, palës shqiptare i është premtuar se paratë do të jenë efektive në muajin shtator të këtij viti. “Kontrata prej 23 milionë USD, e nënshkruar para pak kohëve me BB, është miratuar në Këshillin e Ministrave dhe do t’i paraqitet Bordit të Drejtorëve. Gjithashtu përfaqësuesi i BB ka rekomanduar krijimin e një njësie jashtë ministrisë për manaxhimin e Projektit të Portit të Durrësit”, sqaron drejtori Çili. Gatishmëria e qeverisë dhe agjencive amerikane për financimin e realizimit të Korridorit Ndërkontinental Nr. 8 tashmë pret zbatimin konkret të projekteve të financuara nga pala shqiptare.

ELTON METAJ