15 vite nga ngjarja, analisti Sulo: 21 Janari është hetuar keq me qëllim dhe në mënyrë të paplotë

21 Janari mbetet ende një ngjarje e pazbardhur, teksa për analistin Arjon Sulo hetimet janë kryer keq dhe në mënyrë të paplotë me qëllim. Për të më 21 Janar ndodhi një krim që ndan epokat e historisë politike në Shqipëri, duke theksuar se viktimat u vranë nga strukturat shtetërore, konkretisht nga Garda e Republikës.

“Kemi të bëjmë me të vrarë nga strukturat, autoritete shtetërore, në rastin konkret nga Garda. Aq më tepër që kemi të bëjmë me ngjarje të pazbardhur. 21 Janari ka nevojë të zbardhet sepse është hetuar keq me qëllim dhe është hetuar në mënyrë të paplotë.

Është hetuar keq sepse, nëse në 21 Janar ndodhi një krim i tmerrshëm që ndan epokat e historisë politike në Shqipëri, më 22 janar shteti iu nënshtrua pushtetit. Mos zbatimi i urdhër-arresteve nga ana e prokurorisë, me çfarëdo arsyetimi, është puç shtetëror, është grusht shteti nëse ti ndalon akuzën të veprojë. Është e paplotë sepse ngjarja fillon me dhunë që rrallë herë të ketë ndodhur në protesta dhe demonstrata të pluralizmit”, tha Sulo.