Kryetari i PDK-së, Nard Ndoka kritikon kodin zgjedhor të vitit 2008, duke e cilësuar si problematik dhe pengesë për ardhjen e opozitës në pushtet, edhe në kushte normale apo me qeveri teknike. Ndoka theksoi se sistemi aktual krijon pabarazi në votë dhe disbalanca në mandate mes qarqeve, duke e konsideruar në disa raste edhe antikushtetues. Ai kujtoi se ka kundërshtuar këtë kod që në momentin e miratimit, për të cilin kishte ndërmarrë edhe grevë.
Duke folur për opozitën, ai u shpreh se ajo nuk po përmbush rolin e saj si “pasqyra” e qeverisë, duke e cilësuar të dobët në aspektin institucional dhe pa standard të qartë në sjelljen politike. Sipas tij, kjo situatë bën që qeveria të mos reflektojë dhe të mos përballet realisht me problemet e saj.
I ftuar në ”A2Cnn”, Ndoka kritikoi edhe reformën territoriale, duke e quajtur një dështim që ka rritur administratën dhe ka larguar shërbimet nga qytetarët, ndërsa shpenzimet për paga janë rritur më shumë se investimet.
Në fund, ai akuzoi opozitën për mungesë qëndrimi të qartë dhe për marrëveshje të fshehta politike, duke theksuar se problemi kryesor mbetet morali në politikën shqiptare, që sipas tij duhet të bazohet në konsensus dhe jo në pazare.