17-vjeçari shpëtoi nga lavatriçja, ja gjendja e Ramë Lalës

Tërmeti tragjik i 26 nëntorit, la 51 viktima por nga rrënojat dolën edhe të gjallë. Ministrja e Shëndetësisë, Ogerta Manastirliu, zbuloi në rubrikën “Opinion”, në Neës24, se si është aktualisht gjendja shëndetësore e Ramë Lalës, të vetmit të mbijetuar nga familja Lala në Durrës, që u shua nën rrënojat e tërmetit katastrofik të 26 nëntorit.

E ftuar në studio, ministrja Manastirliu deklaroi se fatmirësisht 17-vjeçari Ramë Lala ndodhet në gjendje të mirë shëndetësore. Sipas saj, i riu i është nënshtruar një ndërhyrjeje kirurgjikale dhe i duhet kohë për t’u rikuperuar, por gjendja e tij është e stabilizuar.

“Ramë Lala është shumë mirë, ka superuar çdo lloj rreziku. Kam marrë informacion të përditshëm, gjendja e tij është e stabilizuar. Ka bërë një ndërhyrje kirurgjikale dhe duhet kohë për t’u rikuperuar. Gjendja e djalit është nën monitorim. Nuk kemi pasur rast tjetër të komplikuar për ta çuar jashtë”.