18-vjeçari nuk e fitoi betejën me Covid-19, shoku: Jemi të shokuar, ai e donte jetën

E hëna rezultoi ditë e rëndë sa i takon situatës nga Covid-19. Një 18-vjeçar nga Elbasani që ishte shtruar tek spitali Covid 2 (Shefqet Ndroqi) nuk e ka fituar betejën me Covid-19. I ndjeri ishte shtruar aty prej një jave së bashku me prindërit, dhe mësohet se shkoi në spital me mushkëri 100% të prekur. Po ashtu mësohet se i riu nuk kishte asnjë sëmundje bashkëshoqëruese. Në një lidhje me skype në emisionin “Shqipëria Live”, shoku i tij i fëmijërisë, Xhuliano Mata tregoi më shumë për të riun.

Si e more vesh lajmin?

Kam qenë në shkollë në orë të dytë të tretë dhe na erdhi një lajm i pakonfirmuar. Thjesht që Qamili ka ndërruar jetë, kemi ngelur të shokuar, pa fjalë, se ai ka qenë njeri pozitiv pa asnjë sëmundje. Në fillim nuk e besuam. Unë e kam pasur shok fëmijërie, ka jetuar në Memaliaj dhe më pas u largua.

Si e more vesh që ishte i infektuar me Covid-19?

Ai kishte shumë qejf kuzhinën, si pasion dhe punonte kur kishte kohë të lirë, donte të ishte dikush për më vonë. Ai vazhdoi një shkollë profesionale, donte punën, donte jetën. Babai i tij ishte në intubim.

Kur ke komunikuar për herë të fundit me të?

Komunikova para 10 ditësh para se të prekej. Na ka ardhur e papritur në fillim që nga karantinimi sepse jemi dhe në moshë të re. Ai ishte tip energjik, nuk i trembej diçkaje, nuk e mendonim shumë se do të prekeshim, ai mendonte për familjen për babanë, nënën. Familja e tyre përbëhet nga dy vëllezër dhe një motër më të mëdha se ai, të cilët janë në gjendje të mirë shëndetësore, veç babait.