2 viktima, më shumë të shëruar sesa raste të reja nga Covid-19

Pas lajmit për hapjen e ambienteve të mbyllura, një tjetër lajm të mirë jep Ministria e Shëndetësisë. Në 24 orët e fundit betejën me virusin vdekjeprurës e kanë fituar 137 pacientë, duke e çuar në 7534 numrin e personave që e kanë mundur Covid-19 që nga fillimi i epidemisë. Në deklaratën për shtyp, Dr. Marjeta Dervishi nga Instituti i Shëndetit Publik tha se betejën nuk e kanë fituar 2 pacientë të prekur nga Covid-19. ”Në 24 orët e fundit, me gjithë përpjekjet e mjekëve, fatkeqësisht e kanë humbur betejën me Covid-19, 2 qytetarë nga Tirana, një 66-vjeçar dhe 73-vjeçar me sëmundje bashkëshoqëruese. Ministria e Shëndetësisë dhe Mbrojtjes Sociale i shpreh ngushëllimet familjarëve”,-tha Dervishi.

Vijojnë testimet dhe gjurmimi i rasteve të dyshuara në të gjithë vendin. Në 24 orët e fundit janë kryer 832 testime dhe janë konfirmuar 106 të prekur me virusin në këto zona: 31 të prekur në Tiranë, 12 në Durrës, 10 në Shkodër, 6 raste në Korçë, Kukës, Lushnje, 5 raste në Dibër, 4 raste në Fier, Kavajë, 3 raste në Kurbin, Elbasan, 2 raste në Devoll, Lezhë, Vlorë, 1 rast në Krujë, Rrogozhinë, Mat, Gjirokastër, Përmet, Divjakë, Malësi e Madhe, Bulqizë, Klos, Patos.

Për më tepër, Dervishi informoi se aktualisht në spitalin Infektiv dhe “Shefqet Ndroqi” po trajtohen 182 pacientë, 18 në terapi intensive nga të cilët vetëm 5 pacientë janë të intubuar. Në emër të Ministrisë së Shëndetësisë dhe Mbrojtjes Sociale, ajo bëri thirrje që qytetarët të mos e ulin vigjilencën për zbatimin e masave anti-covid.

”Ruani distancën fizike me persona që nuk janë familjarët tuaj, kujdesuni për higjienën personale dhe sigurohuni të mbani maskën në ambiente të mbyllura dhe kudo ku nuk arrini të ruani distancën. Ju lutemi mos neglizhoni shenjat e Covid-19, në çdo rast kur keni shenja të sëmundjes telefononi në numrin unik të Urgjencës Kombëtare 127. Ndërsa nëpërmjet linjës së gjelbër 0800 40 40 mund të lidheni me mjekun tuaj të familjes, të merrni këshillim psikologjik si dhe informoheni saktë mbi Covid-19″, tha në fund të deklaratës për mediat, Dr. Marjeta Dervishi.

COVID-19 – Statistika (27 Shtator 2020)

Testime totale 85.554
Raste pozitive 13259
Raste të shëruara 7534
Raste Aktive 5348
Humbje jete 377
(Qarku Tiranë 179, Durrës 46, Shkodër 40, Elbasan 26, Fier 20, Korçë 19, Lezhë 16, Kukës 10, Dibër 8, Vlorë 7, Gjirokastër 4, Berat 2).

Shpërndarja gjeografike e rasteve aktive sipas qarqeve:

Tiranë 2637
Durrës 587
Shkodër 386
Elbasan 309
Lezhë 298
Fier 250
Korçë 240
Vlorë 200
Kukës 154
Berat 108
Dibër 104
Gjirokastër 75

https://www.facebook.com/OgertaManastirliu/videos/804323490399781/