23 motomjete të reja, drejtori Hita: Forcojnë kapacitetet operacionale të forcës ”Shqiponja” dhe Policisë Rrugore

Drejtori i përgjithshëm i Policisë së Shtetit deklaroi se 23 motomjete të reja, të financuara nga fondet e përfituara nga pasuritë e sekuestruara dhe të konfiskuara me origjinë nga veprimtari kriminale, do të forcojnë kapacitetet operacionale të Forcës së Posaçme “Shqiponja” dhe Policisë Rrugore.

Gjatë ceremonisë së sotme të prezantimit të motomjeteve, ku i pranishëm edhe ministri i Punëve të Brendshme, Besfort Lamallari, Hita theksoi se investimi ka një simbolikë të veçantë, pasi pasuritë e përfituara nga aktiviteti kriminal po rikthehen në shërbim të sigurisë së qytetarëve. Sipas tij, mjetet e reja do t’u mundësojnë strukturave të Policisë së Shtetit reagim më të shpejtë në raste emergjente, parandalim më efektiv të ngjarjeve kriminale dhe kontroll më të mirë të territorit, veçanërisht në kushtet e fluksit të shtuar të qarkullimit rrugor dhe sezonit turistik.

Drejtori i Policisë nënvizoi se investimi pasqyron mbështetjen e Qeverisë shqiptare dhe të ministrisë së Punëve të Brendshme për modernizimin e Policisë së Shtetit dhe rritjen e kapaciteteve të saj logjistike e operacionale. Ai vlerësoi bashkëpunimin me Agjencinë e Administrimit të Pasurive të Sekuestruara dhe të Konfiskuara, duke bërë të ditur se për periudhën 2024–2026, përmes kësaj agjencie janë mundësuar financime në vlerën e rreth 4,7 milionë eurove për investime në Policinë e Shtetit.

Sipas tij, këto fonde janë përdorur për fuqizimin e strukturave të hetimit të narkotikëve dhe të Forcës së Posaçme Operacionale, për rritjen e sigurisë kufitare me sistemet e-Gate në portet e Durrësit dhe Sarandës, si edhe për blerjen e automjeteve, pajisjeve dhe softuerëve të avancuar për luftën kundër krimit kibernetik. Ai bëri të ditur gjithashtu se është në proces blerja e pajisjeve të specializuara “shihedhëse”. Në fjalën e tij, drejtori i Policisë u bëri thirrje punonjësve të Policisë së Shtetit të vijojnë të ushtrojnë detyrën me integritet, profesionalizëm dhe përkushtim, duke garantuar rendin, sigurinë publike dhe një shërbim sa më pranë qytetarëve.