264 jahte turistike gjatë verës, 3.3 milionë turistë

Që nga fillimi i muajit gusht në kalatën nr. 4 të portit të Durrësit janë ankoruar 70 jahte dhe motoskafë turistikë, bëhet e ditur nga Qendra e Informacionit në Autoritetin Portual Durrës. Vizitat e jahteve në Durrës janë shtuar ndjeshëm gjatë stinës së verës dhe sipas të dhënave statistikore që nga fillimi i muajit qershor në portin më të madh të vendit janë ankoruar 264 jahte dhe motoskafë gjithsej.

Numri i motoskafëve dhe jahteve me personel nga vende të ndryshme të botës, që kanë preferuar të vizitojnë Shqipërinë nëpërmjet Durrësit është rritur ndjeshëm gjatë tre muajve të fundit, kur APD mori masa që e gjithë kalata 4 të vihej në dispozicion të anijeve turistike. Ndërkaq, mësohet se që nga fillimi i vitit numri i jahteve të ankoruara në Durrës ka arritur në 318.

Shqipëria u vizitua nga nga 3.3 milionë turistë të huaj në 7 muajt e parë të vitit. Të dhënat janë bërë publike nga instituti i statistikave, i cili raportoi se numri i të huajve për këto 7 muaj është rritur me 12.4 për qind krahasuar me një vit më parë. Sipas Instat në vendin e parë qëndrojnë kosovarët. Në 7 muajt e parë të vitit, Shqipëria u vizitua nga 1 milionë e 57 mijë kosovarë me një rritje prej 13.7 për qind krahasuar me 7 mujorin e vitit të kaluar.

Pas shqiptarëve të Kosovës, në vendin e dytë renditen shtetasit nga Maqedonia e Veriut. Për janar korrik të këtij viti, rezultojnë mbi 372 mijë turistë nga Maqedonia e veriut që kanë vizituar Shqipërinë me një rritje prej 3.4 për qind vit me vit. Më pas në listë vijnë grekët, malazezët, anglezët dhe italianët, hyrjet e të cilëve për këtë vit variojnë nga 159 mijë deri në 311 mijë pushues.

Shumica e vendeve që kanë fluksin më të madh të turistëve në Shqipëri janë ato me numrin më të madh të emigrantë e shqiptarë. Kjo do të thotë se një pjesë e madhe e turistëve që raportohen si të huaj janë shtetas shqiptarë, të pajisur me dokumentet e vendeve ku kanë emigruar. Kriza politike e kësaj vere, e cila kulmoi me mbajtjen e zgjedhjeve të njëanshme pa opozitën në fund të qershorit pati krijuar shqetësim për dekurajimin e turistëve të huaj. Të dhënat e raportuar nga Instat, tregojnë se fluksi i pushuesve nga jashtë ka vazhduar të rritet me ritme dyshifrore.