27-vjeçari nuk i bindet urdhrit të policisë, hedh armën dhe largohet

Një 27-vjeçar nga Laçi është shpallur në kërkim nga Policia, pasi nuk i është bindur urdhrit të policisë për të ndaluar automjetin, ndërsa në tentativë largimi, ka hedhur një armë zjarri tip pistoletë dhe është larguar.

Njoftimi i plotë

Shërbimet e Komisariatit të Policisë Nr. 1, në bashkëpunim me Sektorin e Forcës së Posaçme “Shqiponja”, në vijim të punës për goditjen e paligjshmërive, bazuar në informacionet e siguruara në rrugë operative, kanë organizuar dhe finalizuar operacionin policor të koduar “Kodra e diellit”.

Gjatë operacionit, te Kodra e Diellit, shërbimet e Policisë kanë lokalizuar dy automjete të cilave iu kanë bërë shenjë ndalimi, por drejtuesit e tyre nuk iu janë bindur urdhrave dhe kanë tentuar të largohen. Njëri prej tyre ka braktisur automjetin dhe është larguar me vrap duke hedhur në tokë një armë zjarri pistoletë, ndërsa drejtuesi tjetër është kapur dhe ndaluar bashkë me pasagjerin. Në vijim të veprimeve, u identifikua dhe u shpall në kërkim drejtuesi që braktisi automjetin, shtetasi A. I., 27 vjeç, banues në Laç. Vijon puna për kapjen e tij.”

Ndërkohë, blutë e kryeqytetit njoftojnë se kanë nisur procedim edhe ndaj dy personave të tjerë, të cilët udhëtonin me një automjet tjetër, pasi gjatë kontrollit fizik i është gjetur një sasi municioni luftarak.

“Gjithashtu, nisi procedimi në gjendje të lirë për shtetasin E. P., 27 vjeç, banues në Laç, për veprën penale “Mosbindja ndaj urdhrit të punonjësve të policisë”, pasi nuk i është bindur urdhrit për të ndaluar automjetin, si dhe për shtetasin E. A., 31 vjeç, banues në Tiranë, pasagjeri në këtë automjet, për veprën penale “Mbajtja pa leje dhe prodhimi i armëve, armëve shpërthyese dhe i municionit”, pasi gjatë kontrollit fizik iu gjet municion luftarak.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.