3 viktima dhe 144 raste të reja, Cami: 174 të shtruar në spitalet Covid

Covid-19 vijon që të përhapet në Shqipëri. Betejën në 24 orët e fundit nuk e kanë fituar tre pacientë të prekur nga Covid-19. Dr.Mirela Cami nga Ministria e Shëndetësisë, bëri me dije se ”Në 24 orët e fundit, me gjithë përpjekjet e mjekëve, e kanë humbur betejën me Covid19 një 57-vjeçar nga Lushnja dhe një 74-vjeçar dhe një 83-vjeçar nga Tirana. Ministria e Shëndetësisë dhe Mbrojtjes Sociale u shpreh ngushëllimet familjarëve”,- tha ajo.

Nga ana tjetër, ajo tha se janë kryer në 24 orët e fundit 824 testime dhe janë konfirmuar 144 qytetarë të prekur me Covid-19. ”55 raste në Tiranë, 15 në Fier, 10 në Elbasan, 9 në Vlorë, nga 7 raste në Durrës, Kurbin, Divjakë, Gramsh, 6 në Korçë, 5 në Lushnje, nga 3 raste në Shkodër, Pogradec, Delvinë, nga 2 raste në Krujë, Përmet, nga 1 rast në Kavajë, Berat, Gjirokastër”,- tha Cami.

Betejën me virusin vdekjeprurës e kanë fituar edhe 65 qytetarë, duke e çuar në 6733 që nga fillimi i epidemisë. Situata në spitale vijon të jetë e qëndrueshme. Aktualisht në spitalin Infektiv dhe “Shefqet Ndroqi” po trajtohen 174 pacientë, 16 në terapi intensive nga të cilët 6 pacientë janë të intubuar.

Ministria e Shëndetësisë dhe Mbrojtjes Sociale ju kujton të mos neglizhoni shenjat e sëmundjes dhe në çdo rast të kontaktoni urgjencën kombëtare në numrin 127, kur dyshoni se jeni i prekur nga Sars-Cov2. ”Ministria e Shëndetësisë dhe Mbrojtjes Sociale apelon qytetarët që të jenë të kujdesshëm në zbatimin e masave anti-covid për të frenuar përhapjen e infeksionit. Ruani distancën fizike, lani shpesh duart, përdorni maska ose barriera mbrojtëse në ambiente të mbyllura dhe kudo ku nuk është e mundur të ruhet distanca, dezinfektoni objektet dhe ajrosni ambientet ku qëndroni. Mos e ulni vigjilencën, virusi është ende mes nesh, dhe ne mund ta mposhtim atë vetëm nëse zbatojmë çdo ditë rregullat e vendosura”,-tha më tej Cami.

Statistika (16 Shtator 2020)

Testime totale 76400
Raste pozitive 11816
Raste të shëruara 6733
Raste Aktive 4740
Humbje jete 343
(Qarku Tiranë 165, Durrës 45, Shkodër 39, Elbasan 21, Fier 18, Korçë 15, Lezhë 13, Kukës 8, Dibër 7, Vlorë 6, Gjirokastër 4, Berat 2).

Shpërndarja gjeografike e rasteve aktive sipas qarqeve:

Tiranë 2372
Durrës 526
Shkodër 365
Lezhë 274
Elbasan 262
Korçë 214
Fier 212
Vlorë 181
Kukës 140
Berat 93
Dibër 51
Gjirokastër 50