4 viktima dhe 168 raste të reja nga Covid-19 në Shqipëri

Pandemia e Covid-19 vijon të jetë me shifra të larta në Shqipëri. Ministria e Shëndetësisë, bën me dije se betejën me Covid-19 nuk e kanë fituar 4 pacientë. Në deklaratën për shyp, Dr.Flutura Beqo nga Ministria e Shëndetësisë, bëri të ditur se kush janë viktimat. ”Në 24 orët e fundit kanë humbur betejën me Covid-19 një 53-vjeçare dhe një 87-vjeçar nga Tirana, një 68-vjeçar nga Durrësi dhe një 73-vjeçar nga Korça. Ministria e Shëndetësisë dhe Mbrojtjes Sociale ju shpreh ngushëllimet familjarëve”,- theksoi ajo.

Nga ana tjetër, ajo bëri me dije se në 24 orët e fundit janë kryer 877 testime për të dyshuar të prekur nga Covid-19 dhe janë identifikuar 168 qytetarë të prekur nga virusi vdekjeprurës. ”51 raste në Tiranë, 18 raste në Elbasan, nga 12 raste në Korçë dhe Lezhë, 9 raste në Fier, nga 8 raste në Vlorë dhe Berat, 6 raste në Krujë dhe Kukës, 5 raste në Lushnje, nga 4 raste në Kavajë, Mirditë, Tropojë, nga 3 raste në Shkodër, Gjirokastër, Pogradec, Kolonjë nga 2 raste në Durrës, Devoll, Divjakë, nga 1 rast në Kamëz, Sarandë, Delvinë”,- tha më tej Beqo.

Lajmi i mirë është se betejën e kanë fituar 75 qytetarë, duke e çuar numrin e të shëruarve në 6569 që nga fillimi i epidemisë. Sipas Dr.Flutura Beqo, në spitalin Infektiv dhe “Shefqet Ndroqi” po trajtohen 178 pacientë, 19 në terapi intensive nga të cilët 9 pacientë janë të intubuar.

Me rinisjen e vitit te ri shkollor, Ministria e Shëndetësisë dhe Mbrojtjes Sociale, i drejtohet me një thirrje mësuesve, prindërve, nxënësve, të tregojnë kujdes me zbatimin me përpikëri te masave që frenojnë përhapjen e Covid-19.

”Ministria e Shëndetësisë apelon për respektimin e distancimit social, vendosjen e maskave ose barrierave mbrojtëse, larjen ose dezinfektimin e duarve, ajrosjen e ambienteve, matjen e temperaturës së nxënësve çdo ditë. Të gjitha institucionet arsimore që fillojnë ditën e nesërme mësimin duhet të zbatojnë me rigorozitet Udhëzimin mbi masat anti-covid me qëllim parandalimin e përhapjes së virusit. Strukturat e sistemit shëndetësor janë në gatishmëri për t’ju përgjigjur çdo problematike, si dhe për të identifikuar dhe izoluar në kohë çdo rast të dyshuar. Ju lutemi kontaktoni me mjekun e familjes ose telefononi Urgjencën Kombëtare në numrin 127 nëse dyshoni se ju apo një i afërmi juaj është i prekur nga Covid-19. Telefononi në linjën e gjelbër falas 0800 40 40 nëse nuk e dini cili është mjeku juaj i familjes, dhe për çdo informacion te specializuar dhe te sigurt rreth Covid-19”.

COVID-19-Statistika (13 Shtator 2020)

Testime totale 73904

Raste pozitive 11353

Raste të shëruara 6569

Raste Aktive 4450

Humbje jete 334 (Qarku Tiranë 159, Durrës 45, Shkodër 38, Elbasan 21, Fier 17, Korçë 15, Lezhë 12, Kukës 8, Dibër 7, Vlorë 6, Gjirokastër 4, Berat 2).

Shpërndarja gjeografike e rasteve aktive sipas qarqeve:

Tiranë 2253
Durrës 503
Shkodër 350
Lezhë 260
Elbasan 229
Korçë 202
Fier 185
Vlorë 159
Kukës 140
Berat 79
Dibër 46
Gjirokastër 44