43 gradë, vala e nxehtit afrikan sjell temperatura ekstreme në Ballkan

Një valë e fuqishme të nxehti po afrohet drejt Ballkanit, e shkaktuar nga fenomeni “Heat Dome”, i cili ka bllokuar masa ajri shumë të nxehta nga Afrika e Veriut mbi Europë.

Kulmi i vapës pritet të jetë të enjten, me temperatura që në disa zona të rajonit, si Serbia veriore, Kroacia lindore, Hungaria dhe Rumania perëndimore, mund të arrijnë deri në 40-43 gradë Celsius. Edhe Italia Veriore pritet të përballet me temperatura ekstreme.

Meteorologët paralajmërojnë për net të nxehta, me temperatura minimale mbi 22-26 gradë, duke rritur rrezikun për stres të organizmit. Vapa, thatësira dhe erërat e thata pritet të shtojnë rrezikun për zjarre dhe të rrisin konsumin e energjisë.

Sipas parashikimeve, vala e të nxehtit do të zhvendoset më tej drejt lindjes gjatë ditëve në vijim, ndërsa një tjetër episod i nxehtë mund të prekë Europën Perëndimore javën e ardhshme.