550 aplikantë kalojnë testin fizik për Akademinë e Sigurisë

550 aplikantë për kursin e patrullës së përgjithshme kaluan me sukses testin fizik, ndërsa 181 të tjerë u skualifikuan. Pjesa më e madhe e skualifikimeve nuk plotësuan kriterin e gjatësisë, ndërsa 68 nuk arritën të kalojnë pragun e pikëve. Fazat e radhës janë intervista me gojë dhe testi psikologjik, për 500 vende vakante.

Këta të rinj, vajza dhe djem, janë të apasionuar për t’u bërë pjesë e Policisë së Shtetit. Por, për të arritur deri në një emërim të mundshëm duhet të kalojnë në disa faza testuese, që fillimisht të nisin kursin për patrullë të përgjithshme pranë Akademisë së Sigurisë.

Për këtë vit janë 500 kuota të hapura, ndërsa të hënën u mbyll faza e testit fizik. Jo të gjithë mundën të kalojnë nga kjo fazë, për shkak të vështirësisë dhe nevojës për përgatitje më të mirë fizike.