60 mijë doza të vaksinës kineze më në fund mbërrijnë në Rinas

Kanë mbërritur këtë të diel në Rinas 60 mijë doza të vaksinës kineze, Sinovac. Ministrja e Shëndetësisë, Ogerta Manastirliu ndodhej në aeroportin “Nënë Tereza” për të pritur ngarkesën e dozave të vaksinës Sinovac. Ditën e hënë priten 14 mijë e 40 doza të tjera të vaksinës Pfizer, për të vazhduar me planin e vaksinimit masiv në vend, teksa muajin tjetër pritet të vijë një tjetër sasi vaksinash nga AstraZeneca.

“Sapo kanë mbërritur 60 mijë doza të vaksinës Sinovac, të cilat janë pjesë e kontratës së dytë. 60 mijë doza që do të përdoren për të gjithë qytetarët të cilët janë vaksinuar me dozën e parë, dhe duhet të vijojnë vaksinimin me dozën e dytë. Në Shqipëri kanë mbërritur më shumë se 830 mijë doza në total. Deri ditën e djeshme janë vaksinuar rreth 712 mijë qytetarë. Situata në vend është normalizuar, ka një ulje të rasteve aktive, kjo falë vaksinimit masiv që ka dhënë impaktin e vet. Është gjithmonë vendi për të treguar kujdes, jemi të fokusuar të arrijmë 1 milionë vaksinime në muajin qershor”, tha Manastirliu.

Po ashtu ministrja shtoi se synohet të ulet fasha e grupmoshave që vaksinohen, duke nisur me punonjësit e transportit publik. Ministri i Rindërimit, Arben Ahmetaj, sigurimin e vaksinave, ia faturoi si sukses qeverisë, e cila sipas tij, ka arritur të fitojë këtë betejë ndaj virusit.

“Sot është moment i duhur relfektimi për t’iu kthyer mbrapsht betejës sonë me Covid-19. Këtë betëjë e kemi fituar, vëmendja duhet të vazhdojë. Plani i vaksinimit është i furnizuar jo vetëm me vaksina Sinovac, Pfizer dhe AstraZencea por edhe më tej. Sot nuk mungon asnjë vaksinë. Është premtim i mbajtur, e themi sot, pas datës 25 prill. S’ka të bëjë me zgjedhjet, por me atë që do të bëjë një qeveri”.