61-vjeçari shqiptar në Itali humb jetën pasi bie nga skela teksa punonte

Një ngjarje tragjike është regjistruar paraditen e kësaj të marte në Itali, ku një 61-vjeçar shqiptar ka humbur jetën pasi është rrëzuar nga skela në momentin qe punonte.

Punëtori shqiptar, teksa po punonte në katin e katërt të një skele, u rrëzua nga një lartësi rreth 8-10 metra.

Mësohet se ai ka humbur jetën në vend, ndërsa autoritetet italiane kanë nisur punën për zbardhjen e ngjarjes.

Kryebashkiaku Giancarlo Canepa, i cili mbërriti menjëherë në vendin e aksidentit, shprehu keqardhjen për ngjarjen.

“Një tragjedi, vajtojmë një tjetër vdekje të papritur dhe një tjetër familje të rrënuar. Në këto raste nuk ka fjalë, tani hetimet do të bëjnë punën e tyre për të konstatuar saktësisht se çfarë ka ndodhur dhe për të hedhur dritë mbi të gjitha aspektet e ngjarjes”, mësohet të ketë thënë ai.