67.4% e ujit shpërdorohet, në shtator nis aksioni i qeverisë

Ndërsa zona të tërë në vend vuajnë mungesën e ujit të pijshëm, jo vetëm gjatë stinës së verës, por edhe në periudhën tjetër të vitit, pjesa dërrmuese e ujit të pijshëm që hidhet në rrjet nuk faturohet dhe shpërdoret. Në raportin e Entit Rregullator të ujit për vitin 2014 theksohet se humbjet në sektorin e ujit të pijshëm arrijnë në 67.4%, duke qenë gati dyfish më të larta se ato në sektorin e energjisë përpara aksionit të qeverisë.

“Uji pa të ardhura, është një tregues i cili të paktën në tre vitet e fundit mbetet në nivele aspak të mira dhe përben shqetësimin kryesor në sektor. Niveli i humbjeve në sektor është 67.4% e ujit të prodhuar. Kjo tregon se pjesa më e madhe e ujit të prodhuar humbet, për rrjedhojë nuk gjeneron të ardhura“, theksohet në raportin e Entit Rregullator.

Institucioni mbikëyqrës i sektorit të ujit evindenton edhe problematikën e përhershme dhe të pazgjidhur të mungesës së matësave, çka bën që shumë qytetarë ta pagujnë ujin e pijshëm afrofe.

“Me gjithë përmirësimet në këtë drejtim, momentalisht niveli i faturimit afrofe për konsumatorët mbetet në nivele të larta. Shoqëritë deri në fund të vitit 2010 duhet të kishin përfunduar instalimin e matësave për gjithë klientët jo familjarë, por rezultatet tregojnë se në nivel sektori 23% e klientëve jo familjarë i përkasin ende shërbimit afrofe“, theksohet në raport.

Në shtator qeveria pritet të ndërmarrë në sektorin e ujit të pijshëm një aksion të ngjashëm me atë të energjisë elektrike, për të detyruar të gjithë konsumatorët, familjarë biznese apo institucuione që të paguajnë faturat.