74 vota PRO, Kuvendi miraton huanë prej 302 mln dollarë nga SHBA për pajisje ushtarake. PD bojkoton seancën

Vetëm me 74 votat e deputetëve të PS-së, Kuvendi këtë pasdite miratoi marrëveshjen e huasë prej 302 mln dollarë nga SHBA për pajisje ushtarake, në këtë seancë të fundit për këtë sesion parlamentar. Opozita braktisi sallën, pasi kundërshtoi mënyrën sesi PS-ja sipas tyre ka vepruar. Votimi u bë pasi fillimisht u diskutua për këtë projektligj pa praninë e mediave. Pas votimit, kryetari Niko Peleshi njoftoi edhe mbylljen e seancës.

Kreu i grupit parlamentar socialist, Taulant Balla, tha se marrëveshja është dëshmi e besimit të SHBA-ve ndaj Shqipërisë. Ajo parashikon investime për mbrojtjen edhe në kuadër të angazhimit që Shqipëria ka ndaj NATO-s. Vendi ka 48 muaj kohë për të aktivizuar fondet dhe 12 vjet për ta shlyer. Kredia ofron mundësi periudhe ‘grace’ deri në një vit dhe të drejtën për parapagim pa penalitete.

”Kjo është një marrëveshje historike për Shqipërinë, me rëndësi të veçantë për sigurinë kombëtare të vendit që konfirmon fuqishëm marrëdhëniet e shkëlqyera të Shqipërisë me SHBA-të. Është dëshmi konkrete e besimit të SHBA-ve ndaj Shqipërisë. Shqipëria ka një angazhim të shtuar në rritjen e shpenzimeve për mbrojtjen. Shqipëria mbështet objektivin e ri për të arritur objektivin 5% të NATO-s. Siguria dhe mbrojtja janë prioritete strategjike. Ky financim do të përdoret ekskluzivisht për modernizimin e Forcave të Armatosura, pajijsje dhe shërbime të mbrojtjes sipas standardeve më të larta të NATO-s. Financimi do të disbursohet gradualisht sipas nevojave konkrete të Ministrisë së Mbrojtjes. Shqipëria do të ketë 48 muaj për aktivizimin e fondeve, afat deri në 12 vjet. Çdo përdorim i fondeve do të miratohet nga Agjencia Amerikane e Mbrojtjes duke garantuar transparencë të plotë”, tha Balla.

Opozita refuzoi të marrë pjesë në seancë. Partia Demokratike akuzoi mazhorancën se po shkel Kushtetutën duke kërkuar ratifikimin e saj me procedurë të përshpejtuar dhe pa u vënë më parë në dispozicion deputetëve teksti i plotë i marrëveshjes. “Po marrëveshjes me SHBA! Jo mënyrës antikushtetuese se si Edi Rama kërkon ta miratojë brenda ditës në Parlament. Opozita është pro marrëveshjes, por kërkon të njihet me tekstin e plotë dhe të respektohen procedurat kushtetuese”, tha Gazment Bardhi. Për të njëjtën arsye, grupi i PD kërkoi mbledhjen urgjente të Këshillit të Legjislacionit për të vlerësuar kushtetutshmërinë e procedurës së ndjekur, ndërsa propozoi që marrëveshja të votohej në seancën e së premtes, pas respektimit të afateve ligjore.