A duhet demokratët ta konsiderojnë Sorosin armik?

Nga: Alban Daci

S’kam përfituar asnjëherë asgjë nga Soros, ad nga “Shoqëria e Hapur” e tij, apo nga personat që kanë lidhje me të! Megjithatë, Soros në një vend si Shqipëria është kthyer në argumentin më të rëndësishëm të ditës, duke e akuzuar atë për çdo ngjarje që ndodh në Shqipëri dhe për krizë politike që ka politika shqiptare. Duket se kur nuk pranojmë gabimet tona, kemi një justifikim të gatshëm dhe ai është Soros!

A është Soros armik i PD apo është kthyer në pranojë personale e ndonjërit që në fakt është kundër parimeve të filozofisë së Sorosit?! Duhet të theksojmë se Soros është një ndër njerëzit më të pasur në Botë që pjesën më të madhe të pasurisë së tij e ka dhuruar për bursa studimi apo për projekte që kanë të bëjnë me proceset progresiste të shoqërisë dhe në veçanti që kanë të bëjnë me të drejtat e njeriut e demokracinë.

Soros është ndër të paktët të pasur në Botë që ka një nivel shumë të lartë akademik, kulturor dhe filozofik. Ai është student i Kal Poper nga ku ka marr dhe emrin e “Shoqërisë së Hapur”. Soros nuk është marr në historinë e tij njerëzoee asnjëherë me individ, por me kauza dhe fenomene. Filozofët nuk kanë beteja personale, por kauza ose orientime të mëdha sociale në të cilat besojnë dhe investojnë para dhe kohë. Ka pasur vetëm një rast që Soros është prononcuar kundër një individi e ky ishte president Trump e sigurisht ky i fundit nuk ishte më një individ, por një fenomen i rëndësishëm i fatit të kombit më të madh e demokratik në Botë!

Soros nuk ka një rast të vetëm në historinë e tij, që të jetë marr ose të këtë cenuar sovranitetin e një vendi, por për filozofinë e Soros sovranitetet klasike janë pengesë për zhvillimin e shoqërive të hapura e për pasojë edhe të demokracisë. Në fund të fundit, kjo është filozofia e tij në të cilën ai beson fort! Jeta e Soros është e tillë si e shumë hebrenjve, që sovraniteti nuk ka vlerë, por Kombi si shoqëri kompakte, e hapur në ide dhe demokratike në organizim, mbetet vlerë e pazëvendësueshme që ja vlen sakrifica! Soros është hebre i lindur në Hungari, ka jetuar pak kohë nën nazizmin gjerman, shkolluar në London School dhe amerikan i natyralizuar! Atëherë nëse dikush beson se tek Soros falë eksperiencës së jetës se tij kanë rëndësi kufijtë klasik, atëherë do të thotë se nuk ka kuptuar asgjë!

Më gjeni një pasanik tjetër në Botë të ketë bërë kaq shumë për shoqëritë, demokracinë e të drejtat e njeriut sa ka bërë Soros? Ka më shumë se tetë vite se Soros po prezantohet si armiku i PD! A është në fakt armiku i PD? Për të gjetur përgjigjen e kesaj pyetje duhet të bëjmë ca pyetje të tjera si: A është filozofia e PD në kundërvënie me atë të Soros? Unë, kam përshtypjen, se për fat të keq filozofia e PD së “vjetër” është shumë më e varfër në vlera intelektuale dhe politike se ajo e Soros! Pra, parimisht nuk ka vend për krahasime! Gjithashtu, parimisht PD është e frymëzuar ose më mirë të themi se si subjekt politik është rezultat i Soros me “Shoqëritë e Hapura”. Madje, jo vetëm kaq, Soros e ka rritur nivelin intelektual në politikë, në gazetari, por edhe në vlerave intelektuale në shoqërinë shqiptare, falë trajnimeve, programeve dhe bursave të ndryshme të studimit. Pra, Soros ka ndihmuar që shqiptarët të jenë më të ditur, më demokrat dhe me të hapur me fenomenet progresiste!

A është Soros armik i demokratëve dhe shqiptarëve? Në filozofinë e Soros armiqësia është arsyeja kryesore e konflikteve sociale duke i mbajtur peng dhe të mbyllura shoqëritë për të mos oranuar proceset e reja që i çojnë drejt dimensioneve të reja progresiste dhe liberale! Pra, Soros nuk është armik i shqiptarëve dhe as i demokratëve, por sigurisht disa tek PD, nuk janë të përshtatshëm me shoqëritë e reja duke u kthyer në armiq të fenomeneve reale demokratike e për pasojë kundërshtar edhe të filozofisë soriane!

A janë dy gjëra të ndryshme SHBA dhe Soros? Sigurisht dhe kjo është mrekullia amerikane, sepse individët nuk janë peng të shtetit dhe shteti nuk i vendos ato në kushtet e nënshtrimit! Por, në thelb Soros mbetet një ikonë e rëndësishme e progresit dhe e ëndrrës amerikane! Sigurisht, filozofia ka rryma dhe diversitete mendimi e për pasojë jo çdo amerikan duhet të pajtohet me filozofinë e Soros. Në filozofi nuk ka armiq, por shkolla të ndryshme mendimi e në kompleksitet formojnë panoramën e përgjithshme të mendimit njerëzor duke e pasuruar atë me konkurrencë, ide dhe me vizione!