Ademi apel shkodranëve: Kufizoni lëvizjet dhe respektoni udhëzimet kundër COVID 19

Pamjet shqetësuese të pasdites së sotme ku me dhjetëra qytetarë në grupe u dyndën në rrugët dhe sheshet e qytetit ka detyruar kryebashkiaken e Shkodrës, Voltana Ademi, t’u tërheqë vëmendjen dhe të kërkojë sensibilizimin e tyre për parandalimin e përhapjes së virusit COVID-19.

Shëndeti dhe mirëqenia e të gjithëve është prioritet absolut dhe më e rëndësishme se gjithçka, thotë ajo.

Ademi u bën thirrje shkodranëve të kufizojnë levizjet dhe të respektojnë udhëzimet nga ekspertët për parandalimin e virusit.

-Është shumë e vështirë që brenda pak ditëve, të ndryshojë totalisht jeta jonë, sjellja jonë, ritet më të zakonshme dhe shumë njerëzore. Sidomos është shumë e vështirë për ato familje që kanë punën e përditshme, jo gjithmonë të garantuar, të lidhur direkt me mbijetesën ekonomike ditë pas dite. COVID-19 është një e keqe që nuk e njohim dhe në vende shumë pranë nesh, po shkakton tragjedi.

E vetmja mënyrë për të parandaluar përhapjen, rrjedhimisht edhe pasojat që nuk i dëshiron askush, është të qendrojmë në shtëpitë tona. Nëse ne qendrojmë në shtëpi, dalja nga vetizolimi do bëhet më e shpejtë dhe gjithçka do të kthehet në normalitet brenda një kohe më të shkurtër.

-Dalja nga shtëpia, pa një arsye jetike dhe në oraret e caktuara, rrezikon jetën tuaj, të familjeve tuaja dhe komunitetit tonë. Mos harroni që me daljet favorizoni përhapjen e COVID19 dhe nuk po bëni asgjë tjetër veçse po e vështirësoni edhe më shumë  jetën e familjeve dhe personave më në nevojë të komunitetit e Shkodrës, po vështirësoni mbijetesën e tyre.

– Çdo ditë e tyre pa punë dhe pa asnjë të ardhur minimale, thellon problemet ekonomike të përditshmërisë së tyre të vështirë edhe pa peshën e COVID-9, shkatërron shëndetin e tyre, shëndetin e fëmijëve të tyre, familjet e tyre deri edhe jetën e tyre.

– Ky virus nuk është një grip i thjeshtë, është virus i rëndë që po merr jetën e njerëzve, pa dallime moshe. Nuk është vetëm kaq, vazhdon të jetë kanosje e tërë shoqërisë por dhe parandalohet thjeshtë: Me ndërmarrjën individuale të masave ekstreme të qëndrimit në shtëpi, që fillojnë nga vullneti i mirë i juaj.

– Ndaj, duke besuar në vullnetin e mirë tuaj dhe në dashurinë tuaj për veten, për familjen, për miqtë, dashamirët tuaj dhe shtëpinë tonë të përbashkët – Shkodrën, ju bëj thirrje t’i kufizoni levizjet tuaja dhe të respektoni udhëzimet nga ekspertët për parandalimin e virusit. E mira, e sotmja dhe e nesërmja e komunitetit tonë, është në duart tuaja dhe vetëm së bashku mund ta  kalojmë këtë situatë shumë të vështirë.