Presidenti i Napoli, Aurelio De Laurentiis, ka komentuar së fundmi mundësinë e rikthimit të Antonio Conte në krye të kombëtares italiane, një emër që po përflitet si pasues i mundshëm i Gennaro Gattuso.
Gjatë një eventi gala të zhvilluar në Shtetet e Bashkuara, De Laurentiis u shpreh i hapur për një largim të mundshëm të trajnerit nga Napoli nëse do të vinte një ofertë nga përfaqësuesja: “Nëse më pyesni nëse do ta lija Conten të lirë për t’u rikthyer në kombëtare, mendoj se do të thoja po. Por ai është shumë inteligjent dhe, pa një partner serioz, do ta kishte të vështirë të drejtonte një strukturë të çorganizuar”, deklaroi presidenti.
Aktualisht, Conte ka edhe një vit kontratë me Napolin, skuadër me të cilën sezonin e kaluar u shpall kampion në Serie A, duke rikthyer klubin në majat e futbollit italian.
Ndërkohë, De Laurentiis komentoi edhe fitoren minimale 1-0 të Napolit në ndeshjen e fundit, të cilën e ndoqi nga shtëpia: “E pashë ndeshjen në shtëpi, ishte e jashtëzakonshme. Vuajtëm, por në fund festuam. Edhe pse mungonte Rasmus Højlund, kjo tregoi se të tjerët janë të përkushtuar ndaj kauzës dhe mund ta çojnë ekipin drejt rezultatit pozitiv”, u shpreh ai.