Afganët në Shqipëri, Kryegjyshata Botërore e Bektashinjve: Të ndihmojmë këtë popull që kërkon liri

Kryegjyshata Botërore e Bektashinjve mbështet strehimin e afganëve në vendin tonë, duke theksuar se ky është një qëllim për mbrojtjen e jetës, shëndetit e të gjithë atyre që familjeve që kërkojnë përkrahje. Po ashtu Kryegjyshata Botërore e Bektashinjve bën thirrje që të hapen zemrat shqiptare ashtu siç tradita e shqiptarit e ka zakon dhe të pranojnë njerëz të pafajshëm që e duan jetën e po luftojnë për të. ”Jeta është e shtrenjtë dhe e shenjtë dhe shqiptarët kurdoherë, historikisht e kanë treguar zemërgjerësinë e dashamirësinë për çdo kënd që ka patur nevojë për ta, ju ka ofruar ndihmën, përkrahjen, sofrën e dashurinë vëllazërore”.

Deklarata e plotë

Ashtu sikundër çdo shtet demokratik, çdo shtet paqedashës, edhe shteti Shqiptarë dhe qeveria shqiptare renditet ndër shtetet që me humanizmin e mikpritjen që e karakterizon, mirëpret popullin afgan, në mënyrë që ti mbrohet jeta e të mos kërcënohet e asgjesohet nga talebanët barbarshit, pse qëndroi në krah të NATOS, këtij institucioni paqedashës e ruajtës i jetës dhe i rendit.

I bashkohem dhe uroj përzemërsisht, shtetin dhe qeverinë shqiptare, që ju përgjigj shteteve të Bashkuara të Amerikës, për të ndihmuar këtë popull që kërkon liri, paqe, ngrohtësi e dashamirësi. Që kërkon ti mbrohet jeta e të mos vritet brutalisht e pa mëshirë nga talebanët.

Misioni i komuniteteve fetare jo vetëm në Shqipëri por kudo në botë, është përhapja e vlerave morale, paqedashëse, dhe mikëpritja e shpirtmadhësia. Kryegjyshata Botërore Bektashiane mbështet këtij nismë për strehimin e popullit Afgan në shtetin Shqiptarë, me qëllim mbrojtjen e jetës, shëndetit e të gjithë atyre familjeve që enden rrugëve e kërkojnë një strehë ku të mbështeten , një përkrahje humane, e një sofër të ngrohtë.

Hapni zemrat Shqiptarë ashtu siç ju ka hije ,e tradita e shqiptarit e ka zakon dhe pranoni këta njerëz të pafajshëm që aq shumë e duan jetën e luftojnë për të!

Jeta është e shtrenjtë dhe e shenjtë dhe shqiptarët kurdoherë, historikisht e kanë treguar zemërgjerësinë e dashamirësinë për çdo kënd që ka patur nevojë për ta, ju ka ofruar ndihmën, përkrahjen, sofrën e dashurinë vëllazërore! Edhe këtë herë mikëpritja e zemra çdo besimtari shqiptarë do të hapet e do të mirëpres këtë popull të vuajtur por me besim në Zot e që kërkon të jetojë!