AIDA dhe AKT, bashkëpunim për nxitjen e investimeve në turizëm

Agjencia Shqiptare e Zhvillimit të Investimeve (AIDA) dhe Agjencia Kombëtare e Turizmit (AKT) nënshkruan sot një memorandum mirëkuptimi, me qëllim forcimin e bashkëpunimit institucional për promovimin dhe lehtësimin e investimeve në sektorin e turizmit në Shqipëri. Marrëveshja e cila u nënshkrua mes drejtores së AIDA-s, Laura Saro dhe asaj të AKT-së, Zana Çela, synon të krijojë një qasje të koordinuar ndërmjet dy institucioneve për të nxitur investimet vendase dhe të huaja në zhvillimin e infrastrukturës turistike, produkteve inovative dhe destinacioneve të reja turistike në vend.

Përmes këtij memorandumi, AIDA dhe AKT do të bashkëpunojnë në promovimin e potencialeve turistike të Shqipërisë në tregjet ndërkombëtare, organizimin e aktiviteteve të përbashkëta promovuese, si dhe në mbështetjen e investitorëve të interesuar për sektorin e turizmit. Marrëveshja vlerësohet si një hap i rëndësishëm drejt forcimit të sinergjisë institucionale dhe krijimit të më shumë mundësive për zhvillimin e qëndrueshëm të sektorit turistik, një nga sektorët me potencialin më të madh për ekonominë shqiptare.

Në fokus të bashkëpunimit do të jetë gjithashtu rritja e konkurrueshmërisë së Shqipërisë si destinacion investimesh dhe turizmi, duke promovuar standarde moderne zhvillimi dhe modele të qëndrueshme të menaxhimit turistik. Sektori i turizmit vijon të mbetet një ndër shtyllat kryesore të ekonomisë shqiptare, ndërsa institucionet synojnë të tërheqin më shumë investime strategjike që ndikojnë në rritjen e punësimit, zgjerimin e ofertës turistike dhe zhvillimin ekonomik të vendit.

Në vitin 2025, 12.4 milionë shtetas të huaj që vizituan Shqipërinë shpenzuan 5.72 miliardë euro, 15% më shumë krahasuar me vitin e mëparshëm. Kulmi i sezonit veror solli edhe ndikimin më të madh ekonomik, me 2.3 miliardë euro shpenzime vetëm në tremujorin e tretë. Këto shifra përkthehen në më shumë investime, më shumë punësim dhe zhvillim të qëndrueshëm për ekonominë vendase.