“AIR ALBANIA” – Flamuri shqiptar në qiell

Kompania e parë ajrore Shqiptare “AIR ALBANIA” po programohet me asistencën teknike të kolosit ajror turk “Turkish Airlines”, për plotësimin e të gjitha standardeve të sigurisë dhe do të fillojë shumë shpejt fluturimin drejt destinacioneve të ndryshme.

Drejtori i Autoritetit të Aviacionit Civil Shqiptar, Krislen Keri u shpreh për ATSH-në se, falë këtij projekti, bëhet realitet një linjë ajrore shqiptare me flamurin kombëtar, që t’u shërbejë qytetarëve me të njëjtën cilësi, siç shërbehet nga “Turkish Airlines”.

Strategjia për zhvillimin e mëtejshëm të Avicionit Civil Shqiptar nga qeveria shqiptare është në drejtim të rritjes, dyfishimit dhe trefishimit të kapaciteteve aeroportuale, me qëllim diversifikimin e këtij sektori me impakt në uljen e çmimeve dhe rritjen e cilësisë së shërbimeve për qytetarët.

Keri vuri në dukje se, atashimi i kompanisë shqiptare “Air Albania” pranë “Turkish Airlines” është fat, pasi kjo e fundit është kompani që fluturon në mbi 250 destinacione në të gjithë botën, ka një ekspertizë dhe shkollë aviacioni të jashtëzakonshme dhe ne kemi shumë për të fituar.

Për sa i takon pjesës tregtare, thekson ai, kjo linjë e re ajrore shqiptare do të sjellë lehtësira për qytetarët shqiptarë.

“Natyrshëm që qytetarët e një vendi janë të orientuar drejt një kompanie që ka flamurin e vendit të tyre dhe nga ana tjetër, duke qenë kompani shqiptare që e ka bazën në Tiranë, të gjithë kanë mundësi të fluturojnë me çmime më të ulta dhe të punësohen”, – tha Keri.

https://www.facebook.com/Agjencia.Telegrafike.Shqiptare/videos/1297753153692320/?t=0