Alarm në Pukë, zjarri në Malin e Tërbunit del jashtë kontrollit dhe i afrohet qytetit

Flakët shtrihen në një front prej më shumë se 12 kilometrash dhe përpijnë pyjet me pisha. Terreni i thyer e bën të pamundur ndërhyrjen e mjeteve tokësore, ndërsa autoritetet kërkojnë urgjentisht ndërhyrje nga ajri

Situata e zjarreve në Malin e Tërbunit në Pukë ka hyrë në një fazë kritike. Flakët, të favorizuara nga erërat e forta dhe terreni i vështirë malor, janë përhapur me shpejtësi në një front prej më shumë se 12 kilometrash, duke përfshirë sipërfaqe të konsiderueshme me pyje të larta pishe dhe duke e kthyer situatën në një emergjencë që kërkon ndërhyrje të menjëhershme.

Rreziku tashmë nuk lidhet vetëm me dëmtimin e masivit pyjor. Zjarri po avancon në drejtim të lagjes Pezhvë, duke iu afruar zonave të banuara të qytetit të Pukës. Flakët, të shtyra nga era, mund të ndryshojnë drejtim dhe intensitet brenda pak minutash, duke e bërë gjithnjë e më të vështirë frenimin e tyre vetëm me kapacitetet tokësore.

Një prej vështirësive më të mëdha të operacionit është terreni i thyer dhe i pjerrët i Malit të Tërbunit. Në shumë segmente, mjetet zjarrfikëse nuk mund të afrohen pranë vatrave aktive, duke e kufizuar ndjeshëm mundësinë për të ndërhyrë drejtpërdrejt në frontin e zjarrit.

Efektivët e ushtrisë dhe forcat zjarrfikëse po vijojnë përpjekjet në terren, duke përdorur edhe mjete rrethanore për të frenuar përhapjen e flakëve në pjesët ku është e mundur ndërhyrja. Por përmasat e frontit dhe vështirësia e terrenit e bëjnë thuajse të pamundur kontrollin e të gjithë perimetrit të zjarrit nga toka.

Në këto kushte, çdo orë që kalon pa një ndërhyrje të fuqishme nga ajri rrit rrezikun që zjarri të përparojë drejt zonave të banuara dhe të shkaktojë dëme shumë më të mëdha.

Përballë përshkallëzimit të situatës, autoritetet lokale u kanë drejtuar që prej orëve të mëngjesit kërkesa strukturave qendrore për ndërhyrje urgjente me mjete ajrore dhe helikopterë, duke e konsideruar atë si një nga mundësitë më efektive për goditjen e vatrave që janë të paarritshme nga toka.

Ndërhyrja nga ajri do të ishte veçanërisht e rëndësishme në zonat ku terreni nuk lejon afrimin e mjeteve zjarrfikëse, por edhe për të frenuar përparimin e frontit drejt lagjeve të qytetit.

Situata në Tërbun është një tjetër dëshmi e brishtësisë së pyjeve përballë zjarreve të mëdha, veçanërisht kur temperaturat e larta, thatësira, era dhe terreni malor bashkohen në të njëjtën kohë.

Krahas emergjencës së krijuar në terren, hetimet paraprake kanë ngritur dyshime se zjarri mund të jetë shkaktuar qëllimisht. Megjithatë, deri në këto momente, policia nuk ka bërë të ditur identifikimin apo shoqërimin e ndonjë personi si autor të dyshuar.

Nëse dyshimet për zjarrvënie të qëllimshme do të konfirmohen, përballë një dëmi të tillë ndaj pyjeve dhe rrezikut të drejtpërdrejtë për banorët, çështja merr një dimension edhe më të rëndë penal dhe shoqëror.

Por tani, mbi çdo hetim, qëndron urgjenca e momentit: zjarri duhet ndalur përpara se të mbërrijë te qyteti.

Mali i Tërbunit nuk është thjesht një hapësirë pyjore që po digjet. Është një pasuri natyrore, një pjesë e identitetit të Pukës dhe një mburojë që sot po lufton me flakët. Dhe sa më shumë që zjarri zbret drejt qytetit, aq më pak kohë mbetet për ta kthyer këtë emergjencë nga një katastrofë e mundshme në një tragjedi të shmangur.

AV