Nga: Redjon Shtylla
Ndonëse zgjedhjet e pjesshme janë për 6 bashki, forcat politike në vend e kanë kthyer në një betejë të fortë. Në garën e 6 marsit, kërkojnë që të jenë 11 parti. Kreu i KQZ, Ilirjan Celibashi, bëri me dije se krahas PS-së, PD-së, LSI-së, e PDK-së në Nard Ndokës, janë edhe 7 parti të tjera që kanë kërkuar të regjistrohen në zgjedhjet e pjesshme.
Do të jetë në dorën e KQZ-së, nëse do të miratojë ose jo, pjesëmarrjen e Lëvizjes së Re, Frymës së Re Demokratike, Partisë Kristian Demokrate, Partisë së Reformave Demokratike të Shqipërisë, Bashkimit Demokrat, Lëvizjes së Legalitetit dhe Ballit Kombëtar, si parti apo si pjesë e ndonjë koalicioni në zgjedhjet e pjesshme vendore.
Ajo që bie në sy është që aleatët tradicionalë të PD-së, si Agron Duka, Fatmir Mediu, Dashamir Shehi, Shpëtim Idrizi apo Vangjel Dule kanë qëndruar jashtë garës, duke mos u regjistruar në zgjedhje, ku të hënën ishte afati i fundit. Por këta ende nuk kanë mbajtur një qëndrim, dhe mesa duket kanë në dorë vetëm mandatin e tyre si deputetë dhe PD-ja e Lulzim Bashës, do të shkojë e vetme në zgjedhje.
Fatmir Mediu dhe Dashamir Shehi, nuk marrin anë në përplasjen e radhës mes Bashës dhe Berishës. Ata janë shprehur se fillimisht do të vlerësojnë kandidaturat e PD-së dhe koalicionit “Shtëpia e Lirisë” dhe më pas do të drejtojnë elektoratin e tyre. Deri më tani socialistët dhe “Shtëpia e Lirisë” i kanë zyrtarizuar kandidaturat e tyre, kurse PD-ja ende.
Por çfarë tregon kjo? Sigurisht që forca e tyre në elektorat nuk është aq e madhe, por më së shumti është përplasja Berisha-Basha që i step. Po ashtu ajo që bie në sy është që socialistët janë në garë jo me emra të fortë. Ata mesa duket po trajtojnë si një garë stërvitore.