Alimehmeti për Tiranën: Garoj pa konflikt interesi dhe me ndershmëri

Emri më i përfolur për të qenë kandidati i PD-së për bashkinë e Tiranë në zgjedhjet lokale të 14 majit, është mjeku i njohur Ilir Alimehmeti. Sfidën e parë mjeku thotë se e kaloi gjatë pandemisë me shërbimin ndaj komunitetit, ndërsa tani kryeqytetit sipas tij i duhet një figurë të ndershme dhe pa konflikte interesi.

Ai tha se ”Prova ime ka qenë gjatë pandemisë. Besoj e keni shumë të qartë mungesën time të interesit, papërfshirjen time në babëzinë ekonomike që përfshiu botën, nuk përfshiu vetëm Shqipërinë, papërfshirja në diskutime të tjera që mund të çonin drejt konfliktit publik, edhe pse mund të mos ishin përfitime ekonomike dhe qëndrimi për t’i dhënë shërbimin qytetarit.

Në mjekësinë komunitare shihet komuniteti si individ, nuk më ndryshon asgjë në këtë koncept sepse bëhet fjalë për të njëjtën gjë, për publikun, për komunitetin. Sot është në momentin që e kemi parë se çfarë ka ndodhur në 8 vite.

E kemi parë shumë mirë efektin shkatërrues dhe është dëshpërues sepse na kanë ikur njerëzit. Pse po largohen njerëzit? Për shkak të situatave që janë krijuar këtu. Nuk ikën njeri se është i lumtur, por ikën sepse është i dëshpëruar”.