Misioni Artemis II ka vazhduar me sukses rrugëtimin e tij drejt Hënës, duke kaluar pikën e mesme midis Tokës dhe satelitit natyror, ka njoftuar NASA. Astronautët e Artemis II janë të parët që fluturojnë drejt Hënës që nga misioni Apollo 17 në vitin 1972. Ky mision nuk parashikon ulje në sipërfaqen hënore, pasi qëllimi i tij kryesor është testimi i kapsulës Orion dhe shënon hapat e parë drejt uljes së planifikuar të NASA-s në vitin 2028. Agjencia hapësinore shpreson të krijojë përfundimisht një bazë në Hënë.
Kontrolli i misionit në Hjuston zhvilloi një bisedë me katër astronautët në bordin e kapsulës Orion rreth orës 23:00 të së premtes mbrëma (04:00 UTC), duke i informuar ata për rëndësinë e vendndodhjes së tyre. “Tani jeni më afër Hënës sesa jeni me ne në Tokë,” u tha atyre. NASA bëri të ditur se ata ndodheshin 219,000 kilometra (136,080 milje) larg Tokës. Ky moment historik vjen vetëm dy ditë, pesë orë e 24 minuta pasi ata u nisën nga Kepi Kanaveral, Florida.
Astronautët amerikanë Christina Koch, Victor Glover, Reid Wiseman dhe kanadezi Jeremy Hansen ndodhen tani në një trajektore të ashtuquajtur “kthimi i lirë”, e cila i mundëson Orionit të përdorë gravitetin e Hënës për t’u rrotulluar rreth saj përpara se të kthehet drejt Tokës pa nevojën e shtytjes. Gjatë bisedës me kontrollin e misionit, astronautja Koch shprehu emocionet e ekipit. “Ne të gjithë… patëm një shprehje kolektive gëzimi për këtë… Mund ta shohim Hënën nga dritarja e anijes tani; është një pamje e mrekullueshme,” tha ajo.
Ndërsa rrotulloheshin rreth Tokës, astronautët shkrepën foto të planetit tonë, të cilat NASA i ka publikuar. Midis fotove të realizuara nga komandanti Wiseman ishin një pjesë e harkuar e Tokës e dukshme nga njëra prej dritareve të kapsulës dhe një pamje e gjithë globit me oqeanet të mbuluara nga retë vorbulluese, ku madje mund të shihej edhe një aurorë jeshile në Polin e Veriut. “Ishte momenti më spektakolar, dhe na ndaloi të katërtve në vend,” tha Wiseman gjatë një interviste televizive të mbajtur nga astronautët.
Ndërsa udhëtimi i tyre përparon, astronautët janë duke u përshtatur me hapësirën e tyre të kufizuar. Ata raportuan se brenda anijes kozmike ishte pak ftohtë, por që ata po e bënin atë shtëpinë e tyre. Gjatë orëve të para në bordin e Orionit, ata kryen kontrolle dhe rregulluan probleme të vogla në anijen kozmike, të cilat përfshinin një çështje komunikimi dhe, ç’është më e rëndësishmja, një tualet me defekt. Koch u tha mediave se ishte krenare ta quante veten një hidrauliste hapësinore. “Më pëlqen të them se është ndoshta pajisja më e rëndësishme në bord,” tha Koch. “Kështu që të gjithë morëm frymë lehtësimi kur doli se ishte në rregull,” shtoi ajo. Astronautët kanë kryer gjithashtu stërvitjet e tyre të para, pasi secili duhet të kalojë 30 minuta në ditë duke ushtruar për të kompensuar humbjen e muskujve dhe kockave që ndodh në gravitet zero.
Marrë nga Deutsche Welle