Autoriteti i Mediave Audiovizive (AMA) ka ngritur alarmin për një skemë mashtrimi në Facebook, ku persona të paidentifikuar përdorin imazhin dhe zërin e mjekut Flamur Topi, pa autorizimin e tij, për të promovuar produkte farmaceutike dhe për të vjedhur të dhënat bankare të qytetarëve.
Kryetarja e AMA-s, Armela Krasniqi, bëri të ditur përmes një publikimi në rrjetet sociale se autoriteti është njoftuar nga familjarët e mjekut për qarkullimin e videove të manipuluara, të cilat përmbajnë fragmente nga emisioni i tij “Trupi dhe shëndeti”, i transmetuar më herët në RTSH.
Sipas denoncimit, autorët e kësaj skeme kanë përdorur inteligjencën artificiale për të manipuluar zërin e mjekut dhe për t’i atribuuar atij deklarata të rreme, duke krijuar përshtypjen se ai rekomandon produkte të caktuara farmaceutike.
Pas verifikimeve të kryera, AMA bën me dije se, sipas konfirmimit të marrë nga sistemi bankar, rastet e raportuara lidhen me një skemë mashtrimi që synon marrjen e të dhënave bankare të qytetarëve.
Autoriteti thekson se materiale të tilla shfrytëzojnë besimin e publikut te figurat e njohura, veçanërisht te mjekët, dhe mund të përhapen gjerësisht përmes reklamave të sponsorizuara në rrjetet sociale. Sipas AMA-s, veçanërisht të rrezikuar janë personat e moshuar, të cilët mund të mashtrohen nga rekomandimet e rreme për produkte që pretendohet se shërojnë sëmundje të ndryshme.
AMA u bën thirrje qytetarëve të tregojnë kujdes ndaj videove dhe reklamave që premtojnë shërimin e sëmundjeve, edhe kur në to shfaqen figura të njohura publike.
Autoriteti këshillon që qytetarët të mos blejnë produkte shëndetësore pa u konsultuar më parë me mjekun dhe të mos japin të dhëna personale apo bankare në faqe të dyshimta.
Gjithashtu, qytetarët inkurajohen të raportojnë në platformat përkatëse videot dhe reklamat që përmbajnë materiale të manipuluara, në mënyrë që të kufizohet përhapja e këtyre skemave mashtruese.