Çështja e legjitimitetit të zgjedhjeve të 30 qershorit, kërkesë e bërë nga Voltana Ademi, për avokatin e saj Jordan Daci, është një çështje shumë e madhe dhe nuk ka të bëjë me një kryetar bashkie që duhet t’i zërë vendin dikujt apo jo.
”Është çështje e legjitimitetit të të gjithë sistemit të qeverisjes së pushtetit vendor. Nga ana tjetër, është një pjesë e një mosmarrëveshje të madhe politike që është bërë shkak për këtë krizë të vendit. Ne gjykojmë se çështja është e bazuar si në fakte dhe prova, po ashtu edhe në aspektin kushtetues është e pranueshme. Ne kemi të gjithë besimin se çështja do të pranohet përfundimisht edhe kërkesa sipas objektit tonë”,-tha për ”A2”.
Më tej, ai u shpreh se janë të paktën 6 vendime nga Gjykata Europiane që mbështesin këtë kërkesë. ”Ne i jemi referuar praktikës së konsoliduar të Gjykatës Europiane. Janë të paktën 6 vendime që na japin të drejtë në mënyrë të qartë për qëndrimin tonë dhe duhet të themi që Komisioni i Venecia nuk prek fare atë që ka vendosur Gjykata Europiane e të Drejtave të Njeriut”.
Daci thekson se nëse kërkesa pranohet, 30 qershori rrëzohet dhe duhet të mbahen zgjedhje të reja. ”Nëse kërkesa do të pranohet, të gjitha mandatet e fituara në votimet e 30 qershorit, praktikisht do të ishin të pavlefshme dhe për rrjedhojë duhet të përsëriteshin zgjedhjet në mënyrë urgjente në të gjitha zonat zgjedhore”.